ആംസ്റ്റർഡാം; റെസ്റ്ററന്റ് ബിസിനസ് രംഗത്തേക്ക് മുൻ ഇന്ത്യൻ ക്രിക്കറ്റ് താരം സുരേഷ് റെയ്നയും. ഇന്ത്യയുടെ തനത് ഭക്ഷണ വിഭവങ്ങളുമായി ആംസ്റ്റർഡാമിൽ റെയ്നയുടെ പുതിയ റെസ്റ്ററന്റ് തുറന്നു. റെയ്ന ഇന്ത്യൻ റെസ്റ്ററന്റ് എന്ന പേരിലാണ് റെസ്റ്ററന്റ് തുറന്നത്. സുരേഷ് റെയ്ന തന്നെയാണ് ട്വിറ്ററിലൂടെ ഈ സന്തോഷം പങ്കുവെച്ചത്.
ക്രിക്കറ്റിനോടും ഭക്ഷണത്തോടും എന്നും തനിക്ക് അഭിനിവേശമായിരുന്നു. ഏറ്റവും വിശ്വാസ്യവും സ്വാഭാവികവുമായ ഇന്ത്യയുടെ രുചികൾ യൂറോപ്പിന്റെ ഹൃദയത്തിലേക്ക് നേരിട്ട് എത്തിക്കാനുളള ദൗത്യത്തിലാണ് താനെന്ന് താരം ട്വിറ്ററിൽ കുറിച്ചു. വർഷങ്ങളായി ഭക്ഷണത്തിനോടുളള എന്റെ അഭിനിവേശവും പാചകസാഹസങ്ങളും നിങ്ങൾ കാണുന്നതാണെന്ന് പറഞ്ഞ റെയ്ന വായിൽ വെളളമൂറുന്ന രുചികളാണ് റെസ്റ്ററന്റിൽ ഒരുക്കിയിട്ടുളളതെന്നും ട്വിറ്ററിൽ കുറിച്ചു.
റെയ്ന റെസ്റ്ററന്റിലൂടെ ഒരു സ്വപ്നമാണ് സാക്ഷാത്ക്കരിച്ചതെന്നും റെയ്ന പറയുന്നു. ഇന്ത്യയുടെ വിവിധയിടങ്ങളിലുളള തനത് വിഭവങ്ങളാണ് റെസ്റ്ററന്റിൽ വിളമ്പുക. ഓപ്പണിങ് പ്രമാണിച്ച് ഈ മാസം പ്രത്യേക ഡിസ്കൗണ്ടുകൾ ഉൾപ്പെടെ ഏർപ്പെടുത്തിയിട്ടുണ്ട്.
ഇന്ത്യയിൽ ഏറെ ആരാധകരുളള താരമായിരുന്നു റെയ്ന. 2020 ഓഗസ്്റ്റിൽ ഏകദിന ക്രിക്കറ്റിൽ നിന്ന് വിരമിച്ച സുരേഷ് റെയ്ന ചെന്നൈ സൂപ്പർ കിങ്സിന് വേണ്ടി തുടർന്നും കളിച്ചിരുന്നു. 2022 സീസണിന് മുൻപായിരുന്നു ഐപിഎല്ലിൽ നിന്നും വിരമിച്ചത്. ഉത്തർപ്രദേശിൽ നിന്നുളള താരമാണ് സുരേഷ് റെയ്ന.
ഇന്ത്യയ്ക്ക് വേണ്ടി 226 ഏകദിനങ്ങളും 78 ട്വന്റി 20 കളും 18 ടെസ്റ്റുകളും കളിച്ചിട്ടുണ്ട്. 2011 ലെ ലോകകപ്പ് നേടിയ ടീമിൽ അംഗമായിരുന്നു.
Discussion about this post