ന്യൂഡൽഹി : മോഷ്ടിക്കാനെത്തിയ കള്ളന്മാർ ദമ്പതികൾക്ക് നൂറ് രൂപ നൽകി മടങ്ങി. ഡൽഹിയിലാണ് വിചിത്രമായ സംഭവം നടന്നത്. ദമ്പതികളെ വഴിയിൽ തടഞ്ഞുനിർത്തി പണം മോഷ്ടിക്കാൻ ശ്രമിച്ചപ്പോൾ അവരുടെ കൈയ്യിൽ 20 രൂപ മാത്രമേ ഉള്ളൂവെന്ന് കണ്ടെത്തുകയായിരുന്നു. ഇതോടെ ”നല്ലവരായ കള്ളന്മാർ” കൈയ്യിലുണ്ടായിരുന്ന നൂറ് രൂപ അവർക്ക് നൽകുകയായിരുന്നു.
കിഴക്കൻ ഡൽഹിയിലെ ഫാർഷ് ബസാറിനടുത്താണ് സംഭവം. റോഡിലൂടെ നടക്കുകയായിരുന്ന ദമ്പതികളെ ഹെൽമെറ്റ് ധരിച്ചെത്തിയ രണ്ട് പേർ ചേർന്ന് തടഞ്ഞു നിർത്തുകയായിരുന്നു. തുടർന്ന് ഇവരോട് പണം ചോദിച്ചു. അവരുടെ കൈയ്യിൽ ഒന്നുമില്ലെന്ന് മനസിലായതോടെ എന്തോ സാധനം ദമ്പതിമാർക്ക് നൽകി ഇവർ മടങ്ങി. ഇതിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.
കൈയ്യിൽ വെച്ചുതന്നത് നൂറ് രൂപയുടെ നോട്ടാണെന്ന് ദമ്പതികൾ പിന്നീട് പോലീസ്നോട് പറഞ്ഞു. തൊട്ടടുത്ത് നിർത്തിയിട്ടിരുന്ന ഇരുചക്രവാഹനത്തിൽ ഇവർ കയറിപ്പോകുന്നതും വീഡിയോയിൽ കാണാം.
200 ഓളം സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ രണ്ട് മോഷ്ടാക്കളെയും പോലീസ് അറസ്റ്റ് ചെയ്തു. ഇവരിൽ നിന്ന് 30 മൊബൈൽ ഫോണുകൾ പിടിച്ചെടുത്തു. ദേവ് വർമ്മ, ഹർഷ രജ്പുത് എന്നിവരാണ് പിടിയിലായത്. ദേവ് വർമ്മ ഒരു സ്വകാര്യ ജിഎസ്ടി സ്ഥാപനത്തിലെ അക്കൗണ്ടന്റാണ്, രജ്പുത് ഒരു സ്വകാര്യ കമ്പനിയിൽ ജോലി ചെയ്യുന്നു.
ഗുണ്ടാസംഘം നീരജ് ബവാനയുടെ വീഡിയോകൾ ഇരുവരെയും സ്വാധീനിച്ചെന്നും അയാളുടെ സംഘത്തിൽ ചേരാൻ ആഗ്രഹിക്കുന്നുവെന്നും ഇരുവരും പോലീസിനോട് പറഞ്ഞതായി റിപ്പോർട്ടുണ്ട്.
Discussion about this post