കൊച്ചി: നീണ്ട ആറുവർഷത്തെ ഇടവേളക്ക് ശേഷം ചലച്ചിത്ര നിർമ്മാണ രംഗത്തേക്ക് മടങ്ങിവരുന്ന സന്തോഷം പങ്കുവെച്ച് സാന്ദ്രാ തോമസ്. സാന്ദ്രാതോമസ് പ്രൊഡക്ഷൻസ് എന്ന ബാനറിന്റെ ആദ്യ സിനിമാസംരംഭമായ ‘നല്ല നിലാവുള്ള രാത്രി’ എന്ന സിനിമയുടെ റിലീസിന് മുന്നോടിയായി ഫേസ്ബുക്ക് കുറിപ്പിലായിരുന്നു പ്രതികരണം.
കഴിഞ്ഞ കാലങ്ങളിൽ പ്രേക്ഷകർ നൽകിയ സ്നേഹവും കരുതലും സപ്പോർട്ടും വിശ്വാസവുമാണ് ‘സാന്ദ്രാതോമസ് പ്രൊഡക്ഷൻസിന്റെ കരുത്തെന്ന് അവർ കുറിച്ചു. വമ്പൻ താരനിരയില്ലാതെ സിനിമ ഒരുക്കുവാൻ പ്രചോദനമാകുന്നതും നല്ല സിനിമയെ സ്നേഹിക്കുന്ന പ്രേക്ഷകരിലുള്ള ആ വിശ്വാസംകൊണ്ടാണ്. പേരുപോലെ തന്നെ മനോഹരമായ ‘നല്ല നിലാവുള്ള രാത്രി’ നിങ്ങൾക്കും വ്യത്യസ്ത അനുഭവം നൽകുന്ന സിനിമയാകുമെന്ന് ഉറപ്പുണ്ടെന്നും സാന്ദ്രാ തോമസ് കുറിച്ചു.
മർഫി ദേവസി എന്ന പുതുമുഖ സംവിധായകനടക്കം നിരവധി അണിയറപ്രവർത്തകരുടെ അധ്വാനവും പ്രതീക്ഷയുമാണ് ഈ ചിത്രം. പുതിയ സംവിധായകർക്കും അണിയറപ്രവർത്തകർക്കും നടീനടന്മാർക്കും അവസരം നൽകാൻ മടിയില്ല. അതു പൂർണ്ണമാകണമെങ്കിൽ പ്രേക്ഷകരും ഒപ്പം ഉണ്ടാകണം. ഒരുപാട് പ്രതീക്ഷയോടെ ‘നല്ല നിലാവുള്ള രാത്രി’ നിങ്ങളെ ഏൽപ്പിക്കുകയാണെന്ന് സാന്ദ്ര കുറിച്ചു.
ഒത്തിരി പ്രതിസന്ധികൾ മറികടന്നാണ് ഈ ചിത്രം നാളെ നിങ്ങൾക്കു മുന്നിലെത്തിക്കുന്നതെന്ന് സാന്ദ്ര പറഞ്ഞു. കുറെനാളുകൾക്ക് ശേഷം ഒരു ആക്ഷൻത്രില്ലർ, ഒരു പ്രത്യേക നായകനടൻ ഇല്ലാത്ത എല്ലാ കഥാപാത്രങ്ങൾക്കും ഗ്രേ ഷേഡുള്ള സിനിമ. പ്രവചനാതീതമായ രണ്ടാംപകുതി, താളം പിടിക്കാൻ താനാരോ പാട്ട് അങ്ങനെ തീയേറ്ററിൽ പോയി സിനിമ കാണുന്ന പ്രേക്ഷകന് വ്യത്യസ്ത അനുഭവം പകർന്നുനൽകാൻ കഴിയുന്ന സിനിമയാകുമിതെന്നും അവർ കുറിച്ചു.
