തീവ്രമായ കാലാവസ്ഥ വ്യതിയാനങ്ങളാണ് ഭൂമിയുടെ പല ഭാഗത്തും ഇപ്പോൾ സംഭവിച്ചുകൊണ്ടിരിക്കുന്നത്. ഇതോടൊപ്പം വ്യാഴാഴ്ച ഭൂമി അതിന്റെ ഭ്രമണപഥത്തിൽ സൂര്യനിൽ നിന്ന് ഏറ്റവും അകലെയുള്ള സ്ഥാനത്തെത്തുകയാണ്. അഫെലിയോൺ എന്നാണ് ഈ സ്ഥാനം അറിയപ്പെടുന്നത്.
ദീർഘവൃത്താകൃതിയിലുള്ള പാതയിലൂടെയാണ് ഭൂമി സൂര്യനുചുറ്റും സഞ്ചരിക്കുന്നത്. സൂര്യൻ ഈ ദീർഘവൃത്തത്തിന്റെ രണ്ട് കേന്ദ്രങ്ങളിൽ ഒന്നിൽ സ്ഥിതി ചെയ്യുന്നു. ഈ ദീർഘവൃത്താകൃതി അർത്ഥമാക്കുന്നത് സൂര്യനിൽ നിന്നുള്ള ഭൂമിയുടെ ദൂരം വർഷം മുഴുവനും സ്ഥിരമല്ല എന്നാണ്. വേനൽക്കാലം കഴിഞ്ഞതിനു ശേഷമാണ് ജൂൺ ആദ്യ ദിവസങ്ങളിൽ ഭൂമി അഫെലിയോണിലെത്തുക. അഫെലിയോൺ സമയത്ത് ഭൂമി സൂര്യനിൽ നിന്ന് ഏകദേശം 152.1 ദശലക്ഷം കിലോമീറ്റർ അകലെയാണ് സ്ഥിതി ചെയ്യുക . ഭൂമിയും സൂര്യനും തമ്മിലുള്ള ഈ ദൂരത്തെ ഒരു ജ്യോതിശാസ്ത്ര യൂണിറ്റ് (1AU) എന്ന നിലയിൽ ശാസ്ത്രീയമായി പരാമർശിക്കുന്നു. 1 AU എന്നത് 149.6 ദശലക്ഷം കിലോമീറ്ററിന് തുല്യമാണ്.
എന്നാൽ ഭൂമി സൂര്യനോട് വളരെ അകലെയായിരിക്കുന്ന ഈ സമയത്തും ആഗോള താപനിലയിൽ വലിയ വർദ്ധനവാണ് രേഖപ്പെടുത്തിയിരിക്കുന്നത്. പ്രത്യേകിച്ച് വടക്കൻ അർദ്ധഗോളത്തിൽ വലിയ ചൂട് അനുഭവപ്പെടുന്ന സമയമാണിത്. ഗ്രഹത്തിലെ താപനിലയിലെ വർദ്ധനവ് സൂര്യനിൽ നിന്നുള്ള ദൂരവുമായി നേരിട്ട് ബന്ധപ്പെട്ടിട്ടില്ല എന്നതാണ് ഇതിനു കാരണം . അതായത് സൂര്യനിൽ നിന്നുള്ള ദൂരമല്ല മറിച്ച് ഭൂമിയുടെ അച്ചുതണ്ടിന്റെ ചരിവ് മൂലമുള്ള സൂര്യപ്രകാശത്തിന്റെ വിതരണമാണ് നമ്മൾ അനുഭവിക്കുന്ന താപനില വ്യതിയാനങ്ങളെ പ്രാഥമികമായി നിർണ്ണയിക്കുന്നത്. ഇതാണ് ഭൂമി സൂര്യനിൽ നിന്ന് അകലെയായിട്ടും ഭൂമിയിലെ പല ഭാഗങ്ങളിലും കടുത്ത ചൂട് അനുഭവപ്പെടുന്നതിനുള്ള കാരണം.
Discussion about this post