വ്യത്യസ്ത മേഖലയിൽ നിന്നുള്ളവർ ആണെങ്കിലും പരസ്പരം അടുത്ത വ്യക്തിബന്ധം സൂക്ഷിക്കുന്നവരാണ് മെഗാസ്റ്റാർ മമ്മൂട്ടിയും വ്യവസായിയും ലുലു ഗ്രൂപ്പ് ചെയർമാനുമായ എം.എ.യൂസഫലിയും. ഇപ്പോഴിതാ ഇരുവരും ലണ്ടനിൽ വെച്ച് കണ്ടുമുട്ടിയിരിക്കുകയാണ്. ലണ്ടനിൽ വെച്ച് ഇവർ പങ്കിട്ട സൗഹൃദ നിമിഷങ്ങളുടെ ചിത്രങ്ങൾ ഇപ്പോൾ സമൂഹമാധ്യമങ്ങളിൽ വൈറലാണ്. പൊതുവേ ഫോട്ടോ ഷൂട്ടുകളോട് വലിയ താല്പര്യം ഉള്ള മെഗാസ്റ്റാറിനോടൊപ്പം ഇത്തവണ കേരളത്തിന്റെ വമ്പൻ വ്യവസായി കൂടിച്ചേരുമ്പോൾ ഇരുവരുടെയും ആരാധകർ വലിയ ആവേശത്തോടെയാണ് ഈ ഫോട്ടോകളെ വരവേറ്റത്.
വളരെ അവിചാരിതമായാണ് ഇവർ രണ്ടുപേരും ലണ്ടനിൽ വച്ച് കണ്ടുമുട്ടിയത് എന്നാണ് പറയുന്നത്. ഏതാനും ദിവസങ്ങൾക്കു മുൻപാണ് മമ്മൂട്ടി കുടുംബസമേതം ലണ്ടനിൽ എത്തുന്നത്. കഴിഞ്ഞദിവസം യൂസഫലിയും എത്തി. പ്രതീക്ഷിക്കാതെ മറ്റൊരു വിദേശ രാജ്യത്ത് വച്ചുള്ള ആ കണ്ടുമുട്ടൽ മനോഹരമായി ക്യാമറയിൽ പകർത്താനും ഇവർ മറന്നില്ല.
യുഎഇ യുടെ ഗോൾഡൻ വിസ ആദ്യമായി ലഭിച്ച മലയാള താരങ്ങളിൽ ഒരാളായിരുന്നു മമ്മൂട്ടി. മലയാള താരങ്ങൾക്ക് ഗോൾഡൻ വിസ ലഭിക്കുന്നതിന് കാരണക്കാരനായത് യൂസഫലി ആണെന്ന് ഒരു സൂചന നേരത്തെ തന്നെ ഉണ്ടായിരുന്നു. ഗോൾഡൻ വിസ സ്വീകരിക്കാനെത്തിയ താരങ്ങളെ അവിടെ സ്വീകരിച്ചതും യൂസഫലി ആയിരുന്നു. മമ്മൂട്ടി മോഹൻലാൽ എന്നിവരായെല്ലാം മികച്ച സൗഹൃദം തന്നെയാണ് യൂസഫലി എപ്പോഴും കാത്തു സൂക്ഷിക്കുന്നത്.ഈയിടെ നടന്ന യൂസഫലിയുടെ സഹോദരൻ എം.എ.അഷ്റഫലിയുടെ മകളുടെ വിവാഹത്തിന് മമ്മുട്ടിയും മോഹൻലാലും കുടുംബസമേതം പങ്കെടുക്കുകയും ചെയ്തിരുന്നു.
Discussion about this post