ന്യൂഡൽഹി: വിദേശത്ത് ഭാരത് മാതാ കീ ജയ് കേൾക്കുമ്പോൾ വീട്ടിലെത്തിയ തോന്നലാണ് തന്നിൽ ഉണ്ടാക്കുന്നതെന്ന് പ്രധാനമന്ത്രി നരേന്ദ്രമോദി. പാരീസിൽ ഇന്ത്യൻ സമൂഹത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. രാവിലെയോടെയാണ് പ്രധാനമന്ത്രി നരേന്ദ്രമോദി പാരീസിൽ എത്തിയത്. ഫ്രഞ്ച് പ്രധാനമന്ത്രി എലിസബത്ത് ബോൺ ആണ് അദ്ദേഹത്തെ വിമാനത്താവളത്തിൽ സ്വീകരിച്ചത്.
യുപിഐ പേമെന്റുകൾ ഫ്രാൻസിലും ഉപയോഗിക്കാൻ ധാരണയായെന്നും ഫ്രാൻസിലെ ഇന്ത്യൻ വിനോദസഞ്ചാരികൾക്ക് ഇനി രൂപയിലും ഇടപാടുകൾ നടത്താനാകുമെന്നും പ്രധാനമന്ത്രി പറഞ്ഞു. കരാർ ഒപ്പുവെച്ച് ഞാൻ മടങ്ങും തുടർന്ന് കൊണ്ടുപോകേണ്ടത് നിങ്ങളാണ്. ഈഫൽ ടവറിൽ ഇന്ത്യയിൽ നിന്നുള്ള ധാരാളം വിനോദസഞ്ചാരികൾ വരുന്നതാണ്. അവിടെ യുപിഐ ഇടപാടിലൂടെ രൂപയിൽ നിങ്ങൾക്ക് സാധനങ്ങൾ വാങ്ങാം. അതായത് യുപിഐ ഈഫൽ ടവറിലെത്തി. പ്രധാനമന്ത്രി കൂട്ടിച്ചേർത്തു.
ഇന്ത്യയുടെ സാമൂഹിക മാറ്റത്തിൽ യുപിഐയും മറ്റ് ഡിജിറ്റൽ ഇടപാടുകളും വലിയ പങ്ക് വഹിച്ചിട്ടുണ്ടെന്ന് പ്രധാനമന്ത്രി പറഞ്ഞു. ഫ്രാൻസും ഇന്ത്യയും ഇക്കാര്യത്തിൽ ഒരേ ദിശയിൽ സഞ്ചരിക്കുന്നു എന്നത് സന്തോഷം തരുന്നതാണ്. യുപിഐ ഇടപാടുകൾ ഉപയോഗിക്കാനുളള തീരുമാനം ഇരുരാജ്യങ്ങളും തമ്മിലുളള ഉഭയകക്ഷി വ്യാപാരത്തെയും വിനോദസഞ്ചാരത്തെയും ഏറെ പരിപോഷിപ്പിക്കുമെന്നാണ് വിലയിരുത്തൽ.
ഇന്ത്യയുടെ പ്രവർത്തനങ്ങൾ ഇന്ത്യയ്ക്ക് മാത്രമല്ല ലോകത്തെ മുഴുവൻ മാനവരാശിക്ക് പ്രയോജനം ചെയ്യുന്നതാണെന്ന ഐഎംഎഫിന്റെ പഠന റിപ്പോർട്ടും പ്രധാനമന്ത്രി പരാമർശിച്ചു.
Discussion about this post