ഡല്‍ഹി: ചെന്നൈയില്‍ കനത്ത മഴയിലും വെള്ളപ്പൊക്കത്തിലും മരണമടഞ്ഞവരുടെ കുടുംബത്തിന് പ്രധാനമന്ത്രി നരേന്ദ്ര മോദി രണ്ട് ലക്ഷം രൂപ വീതം സഹായധനം പ്രഖ്യാപിച്ചു. നേരത്തെ, പരിക്കേറ്റവര്‍ക്ക് അടിയന്തര സഹായമായി അന്‍പതിനായിരം രൂപ വീതം പ്രധാനമന്ത്രിയുടെ ദുരിതാശ്വാസ നിധിയില്‍ നിന്നും അനുവദിച്ചിരുന്നു.
വ്യാഴാഴ്ച ചെന്നൈയില്‍ നേരിട്ടെത്തിയ പ്രധാനമന്ത്രി പ്രളയബാധിത മേഖലകളില്‍ വ്യോമനിരീക്ഷണം നടത്തുകയും ദുരിതാശ്വാസപ്രവര്‍ത്തനങ്ങള്‍ക്ക് സംസ്ഥാനത്തിന് 1000 കോടി രൂപയുടെ അടിയന്തര സഹായവും പ്രഖ്യാപിച്ചിരുന്നു. കേന്ദ്രം നേരത്തേ അനുവദിച്ച 940 കോടി രൂപക്ക് പുറമേയാണിത്.
അതിനിടെ കനത്ത നാശം വിതച്ച പേമാരിക്കും പ്രളയത്തിനും ശമനംവന്നതോടെ ചെന്നൈ നഗരം ജീവിതത്തിലേക്ക് തിരിച്ചുവരുന്നു. വ്യാപക പരാതികള്‍ക്കിടയിലും ദുരിതാശ്വാസ പ്രവര്‍ത്തനങ്ങള്‍ സജീവമാണ്. പുതിയ മരണങ്ങളോ കൂട്ടദുരന്തങ്ങളോ റിപ്പോര്‍ട്ട് ചെയ്തിട്ടില്ല. സര്‍ക്കാറിനൊപ്പം വിവിധ രാഷ്ട്രീയ പാര്‍ട്ടികളുടെയും സന്നദ്ധസംഘടനകളുടെയും നേതൃത്വത്തില്‍ ഭക്ഷണം, കുടിവെള്ളം എന്നിവ വ്യാപകമായി വിതരണം ചെയ്യുന്നുണ്ട്.
ദശീയപാതകളും വിവിധ റോഡുകളും ഭാഗികമായി തുറന്നിട്ടുണ്ട്. ചെന്നൈ എഗ്മോര്‍ സ്റ്റേഷനില്‍നിന്ന് ചില ട്രെയിനുകള്‍ ഓടിത്തുടങ്ങി. ചെന്നൈ സെന്‍ട്രലില്‍നിന്ന് അടുത്ത ദിവസങ്ങളില്‍ പൂര്‍ണതോതില്‍ ട്രെയിന്‍ ഗതഗതം പുന$സ്ഥാപിക്കും
Discussion about this post