ന്യൂഡൽഹി: മുതുകിൽ ആറിഞ്ച് ആഴത്തിൽ കത്തി തറച്ചുകയറിയ യുവാവിന്റെ ശസ്ത്രക്രിയ വിജയകരമായി പൂർത്തിയാക്കി. ഡൽഹി എയിംസ് ആശുപത്രിയിലെ ഡോക്ടർമാരാണ് മണിക്കൂറുകൾ നീണ്ട ശസ്ത്രക്രിയയിലൂടെ കത്തി നീക്കം ചെയ്തത്. ഹരിയാന സ്വദേശിയായ 30 കാരനെയാണ് മുതുകിന് കുത്തേറ്റതിനെ തുടർന്ന് ശസ്ത്രക്രിയയ്ക്ക് വിധേയനാക്കിയത്.
ജൂലൈ 12 ന് ഇയാളുടെ സ്വർണക്കടയിൽ മോഷണം നടന്നിരുന്നു. ഇതിനെ ചെറുക്കാൻ ശ്രമിക്കുന്നതിനിടെയാണ് ഇയാൾക്ക് കുത്തേറ്റത്. സംഭവത്തിന് ശേഷം ഇയാളെ രണ്ട് ആശുപത്രികളിൽ പ്രവേശിപ്പിച്ചിരുന്നെങ്കിലും സ്ഥിതി മോശമായതിനാൽ എയിംസിലേക്ക് മാറ്റുകയായിരുന്നു.
ഏറെ വെല്ലുവിളികൾ അതിജീവിച്ചാണ് ശസ്ത്രക്രിയ വിജയകരമായി പൂർത്തിയാക്കിയതെന്ന് ആശുപത്രി അധികൃതർ വ്യക്തമാക്കി. വളരെ ആഴത്തിലായിരുന്നു കത്തി തറച്ചിരുന്നത്. നട്ടെല്ലിൽ ചെറിയ മുറിവ് ഉണ്ടാക്കിയ ശേഷമാണ് കത്തി പുറത്തെടുത്തത്. യുവാവിന്റെ ആരോഗ്യസ്ഥിതിയിൽ പുരോഗതിയുണ്ടെന്നും അധികൃതർ കൂട്ടിച്ചേർത്തു.
Discussion about this post