തെരുവില്‍ തന്നെ കഴിഞ്ഞാ മതിയോ ഞങ്ങള്‍ക്കും യാത്രകള്‍ വേണ്ടേ, കാഴ്ചകള്‍ ആസ്വദിച്ച് നായയുടെ ട്രെയിന്‍ സവാരി, സ്‌റ്റേഷനെത്തിയപ്പോള്‍ കൂളായി ഇറങ്ങി

നായകളുടെയും പൂച്ചകളുടെയും വികൃതികളും കളികളും പലപ്പോഴും ഇന്റെര്‍നെറ്റില്‍ വൈറലാകാറുണ്ട്. വീട്ടിലെ ഓമനമൃഗങ്ങളുടെയും കാട്ടിലെ മൃഗങ്ങളുടെയും ജീവിതക്കാഴ്ചകള്‍ ഒപ്പിയെടുത്ത് സോഷ്യല്‍മീഡിയകളില്‍ പോസ്റ്റ് ചെയ്യുന്നവര്‍ നിരവധിയാണ്. വീട്ടിലും കാട്ടിലും അല്ലാതെ നാട്ടിലെ തെരുവുകളില്‍ അലഞ്ഞുനടക്കുന്ന നായകളുടെ വീഡിയോകളും അടുത്തിടെ വ്യാപകമായി പ്രചരിക്കുന്നുണ്ട്. അതുപക്ഷേ കണ്ണിനോ മനസ്സിനോ അത്രയ്ക്ക് സന്തോഷം നല്‍കുന്നവയല്ല. തെരുവുനായ ആക്രമണ വീഡിയോകള്‍ കണ്ട് മനസ്സ് മടുത്തവര്‍ക്ക് ഒരു നല്ല കാഴ്ച കാണാം.

In life’s journey make a little room for everyone❤️ pic.twitter.com/GncPZNRGeF

— Tara Deshpande (@Tara_Deshpande) July 26, 2023

ട്രെയിന്‍ യാത്ര ആസ്വദിക്കുന്ന ഒരു തെരുവുനായയുടെ വീഡിയോ ട്വിറ്ററില്‍ വൈറലായിക്കൊണ്ടിരിക്കുകയാണ്. താര ദേശ്പാണ്ഡെ എന്ന അക്കൗണ്ടില്‍ നിന്നുമാണ് വീഡിയോ പോസ്റ്റ് ചെയ്തിരിക്കുന്നത്. വളരെ സമാധാനത്തോടെ, ട്രെയിനിലിരുന്ന് കാഴ്ചകളൊക്കെ കണ്ട് യാത്ര നടത്തുന്ന ഈ നായയുടെ വീഡിയോ മനസ്സിന് സന്തോഷം നല്‍കുന്ന ഒരു കാഴ്ച തന്നെയാണ്. സഹയാത്രികരെ കുരച്ച് പേടിപ്പിക്കാനോ, ട്രെയിനില്‍ കേറിയതിന്റെ ആങ്കലാപ്പില്‍ ബഹളമുണ്ടാക്കാനോ നില്‍ക്കാതെ വാതില്‍ക്കല്‍ ഇരുന്ന് പുറത്തെ കാഴ്ചകളും യാത്രയും ആസ്വദിക്കുകയാണ് ആ നായയെന്ന് വീഡിയോ കാണുമ്പോള്‍ അറിയാം. വീഡിയോയുടെ അവസാനം സ്‌റ്റേഷനെത്തുമ്പോള്‍ ട്രെയിന്‍ യാത്ര നടത്തി പരിചയമുള്ളതുപോലെ വിദഗ്ധമായി നായ ട്രെയിന്‍ ഇറങ്ങുന്നതും കാണാം.

‘ജീവിതയാത്രയില്‍ എല്ലാവര്‍ക്കും ഒരല്‍പ്പം ഇടം കൊടുക്കുക’ എന്ന മനോഹരമായ തലക്കെട്ടാണ് താര ഈ വീഡിയോയ്ക്ക് നല്‍കിയിരിക്കുന്നത്. ഈ വീഡിയോ വൈറലായതോടെ മറ്റൊരു തെരുവുനായ ട്രെയിന്‍ യാത്ര നടത്തുന്നതിന്റെ മുംബൈയില്‍ നിന്നുള്ള പഴയ വീഡിയോയും ആളുകള്‍ ഷെയര്‍ ചെയ്യുന്നുണ്ട്. മുംബൈയിലെ ഈ നായ ദിവസവും ബോറിവാലി ലോക്കല്‍ ട്രെയിനില്‍ യാത്ര ചെയ്യാറുണ്ടെന്നാണ് വീഡിയോ നല്‍കുന്ന സൂചന.