പട്ന: ബീഹാറിലെ ദർബംഗ ജില്ലയിൽ മുഹറം ഘോഷയാത്ര കാണാൻ ചെന്ന പെൺകുട്ടിയ്ക്ക് വെടിയേറ്റു. ഗിദർഗഞ്ച് പരിസരത്തുകൂടെ കടന്നുപോകുന്ന മുഹറം ഘോഷയാത്ര കാണാനെത്തിയ പ്രിയ എന്ന 14 കാരിയ്ക്കാണ് വെടിയേറ്റത്. ഉടൻ തന്നെ ദർഭംഗ മെഡിക്കൽ കോളേജ് ആശുപത്രിയിൽ (ഡിഎംസിഎച്ച്) പ്രവേശിപ്പിച്ചു. ശസ്ത്രക്രിയ നടത്തി ബുള്ളറ്റ് പുറത്തെടുത്തു. പെൺകുട്ടി ഇപ്പോൾ അപകടനില തരണം ചെയ്തിട്ടുണ്ട്.
മുഹറം ഘോഷയാത്രയ്ക്കിടെ പടക്കം പൊട്ടുന്ന പോലുള്ള ശബ്ദം കേട്ടുവെന്ന് പ്രിയയുടെ പിതാവ് പറഞ്ഞു. പിതാവിനും മറ്റു കുടുംബാംഗങ്ങൾക്കും ഒപ്പം ഘോഷയാത്ര കാണാനെത്തിയതായിരുന്നു 14 കാരി. ആരാണ് വെടിവച്ചതെന്ന് ഇരിട്ടിൽ വ്യക്തമായില്ലെന്ന് പിതാവ് പറയുന്നു. വയറിൽ നിന്ന് വേദന അനുഭവപ്പെടുന്നുവെന്ന് പറഞ്ഞപ്പോൾ രക്തം ഒലിച്ചിറങ്ങുന്നത് ശ്രദ്ധയിൽപ്പെട്ടു. ആശുപത്രിയിൽ എത്തിച്ചപ്പോഴാണ് വയറിന് വെടിയേറ്റതായി ശ്രദ്ധയിൽപ്പെട്ടത്.
വിഷയം അന്വേഷിച്ചുവരികയാണെന്ന് എസ്പി സാഗർ കുമാർ പറഞ്ഞു. സംഭവത്തിൽ അന്വേഷണം നടത്തി കുറ്റക്കാർക്കെതിരെ നടപടിയെടുക്കുമെന്നും അദ്ദേഹം പറഞ്ഞു.
Discussion about this post