ന്യൂഡൽഹി : സ്വാതന്ത്യത്തിന്റെ നൂറാം വാർഷികമായ 2047 ൽ ഇന്ത്യയെ വികസിത രാജ്യമാക്കുന്ന എന്ന പ്രധാനമന്ത്രി നരേന്ദ്ര മോദിയുടെ സ്വപ്‌നത്തിന് വേണ്ടി പരിശ്രമിക്കുമെന്ന് മുതിർന്ന കോൺഗ്രസ് നേതാവ് എകെ ആന്റണിയുടെ മകൻ അനിൽ ആന്റണി. ബിജെപി ദേശീയ ജനറൽ സെക്രട്ടറിയായി നിയമിതനായതിന് പിന്നാലെയാണ് പ്രതികരണം. പാർട്ടി നേതൃത്വം തന്നിൽ വിശ്വാസം അർപ്പിച്ചതിൽ നന്ദി ഉണ്ടെന്നും ഇനിയും പ്രവർത്തനങ്ങൾ തുടരുമെന്നും അദ്ദേഹം പറഞ്ഞു.
” പാർട്ടി നേതൃത്വം തന്നോട് കാണിച്ച വിശ്വാസത്തിന് പ്രധാനമന്ത്രി നരേന്ദ്ര മോദിക്കും ആഭ്യന്തര മന്ത്രി അമിത് ഷായ്ക്കും പാർട്ടി ദേശീയ അദ്ധ്യക്ഷൻ ജെപി നദ്ദയ്ക്കും എന്റെ രാഷ്ട്രീയ യാത്രയിൽ വഴി കാട്ടിയവരോടും നന്ദി അറിയിക്കുന്നു” അനിൽ ആന്റണി പറഞ്ഞു.
2023 പാർട്ടിയെ സംബന്ധിച്ച് നിർണായകമായ വർഷമാണ്. അടുത്ത ലോക് സഭാ തിരഞ്ഞെടുപ്പിൽ പാർട്ടിയുടെ വിജയം ഉറപ്പിക്കാൻ എല്ലാവരും കഠിനാധ്വാനം ചെയ്യുകയാണ്. ഏറ്റവും വലിയ ഭൂരിപക്ഷത്തോടെ പാർട്ടിയെ അധികാരത്തിലെത്തിക്കാനുള്ള ശ്രമത്തിലാണ് ഓരോ പ്രവർത്തകനും.
സ്വാതന്ത്ര്യത്തിന്റെ നൂറാം വാർഷികമായ 2047 ൽ ഇന്ത്യയെ വികസിത രാജ്യമാക്കുക എന്ന പ്രധാനമന്ത്രി നരേന്ദ്ര മോദിയുടെ സ്വപ്‌നം സാക്ഷാത്ക്കരിക്കാൻ വേണ്ടിയാണ് താൻ പ്രവർത്തിക്കുന്നത് എന്നും അനിൽ ആന്റണി കൂട്ടിച്ചേർത്തു.
13 വൈസ് പ്രസിഡന്റുമാരും ഒമ്പത് ജനറൽ സെക്രട്ടറിമാരും അടങ്ങുന്ന പാർട്ടി ഭാരവാഹികളുടെ പട്ടിക ജെപി നദ്ദയാണ് കഴിഞ്ഞ ദിവസം പുറത്തിറക്കിയത്. കേരളത്തിൽ നിന്ന് അനിൽ ആന്റണിയും അബ്ദുള്ളക്കുട്ടിയുമാണ് പുതിയ ഭാരവാഹി പട്ടികയിൽ ഇടംപിടിച്ചിരിക്കുന്നത്.
Discussion about this post