തിരുവനന്തപുരം : അതീവ സുരക്ഷ മേഖലയായ ശ്രീ പദ്മനാഭ സ്വാമി ക്ഷേത്രത്തിന് മുകളിലൂടെ ഹെലികോപ്റ്റര് പറത്തുന്നതിന് വിലക്കേര്പ്പെടുത്തണമെന്ന് ശുപാര്ശ. സിറ്റി പൊലീസ് കമ്മീഷണര് നാഗരാജുവാണ് ഡിജിപിക്ക് ശുപാര്ശ നല്കിയത്. കഴിഞ്ഞ ദിവസം സ്വകാര്യ കമ്പനിയുടെ ഹെലികോപ്റ്റര് ക്ഷേത്രത്തിന് മുകളിലൂടെ താഴ്ന്ന് പറന്നത് വിവാദമായ പശ്ചാത്തലത്തിലാണ് നടപടി. കഴിഞ്ഞ മാസം 28-ാം തീയതിയാണ് സ്വകാര്യ കമ്പനിയുടെ ഹെലികോപ്റ്റര് നിരവധി തവണ ക്ഷേത്രത്തിന് മുകളിലൂടെ താഴ്ന്ന് വട്ടമിട്ട് പറന്നത്. നിലവില് ഡ്രോണിന് മാത്രമാണ് ക്ഷേത്രത്തിന് മുകളിലൂടെ പറക്കാന് നിയന്ത്രണമുള്ളത്.
ക്ഷേത്രത്തില് അമൂല്യ നിധി ശേഖരം കണ്ടെത്തിയതിനെ തുടര്ന്ന് പദ്മനാഭ സ്വാമി ക്ഷേത്രത്തിനെ അതീവ സുരക്ഷാ മേഖലയായി പ്രഖ്യാപിച്ചിരുന്നു. അവിടെയാണ് അപ്രതീക്ഷിതമായി ഹെലികോപ്റ്റര് സഞ്ചരിക്കുന്നത് ശ്രദ്ധയില്പ്പെട്ടത്. ഇതിനെ തുടര്ന്ന് ക്ഷേത്ര ചുമതലയുള്ള ഡെപ്യൂട്ടി പൊലീസ് സൂപ്രണ്ട് സിറ്റി പൊലീസ് കമ്മീഷണര്ക്ക് റിപ്പോര്ട്ട് നല്കി. സുരക്ഷാപ്രാധാന്യമുള്ള സ്ഥലമായാതിനാല് ഡ്രോണ് നിരോധിത മേഖലയാണ്. നിലവില് ക്ഷേത്രത്തിന് മുകളിലൂടെ ഹെലികോപ്റ്റര് പറത്തുന്നതിന് നിരോധനമില്ല. എന്നാല് സുരക്ഷ മുന് നിര്ത്തി ഹെലികോപ്റ്ററിനും നിരോധനം കൊണ്ടുവരണമെന്ന ശുപാര്ശയാണ് സിറ്റി പൊലീസ് കമ്മീഷണര് നാഗരാജു ഡിജിപിക്ക് നല്കിയത്. ഈ ശുപാര്ശ ഡിജിപി സര്ക്കാരിന് കൈമാറിയാല് കേന്ദ്ര വ്യോമയാമന്ത്രാലത്തിന് കൈമാറും. കേന്ദ്ര വ്യോമയാന മന്ത്രാലയമാണ് വിഷയത്തില് അന്തിമവിജ്ഞാപനം ഇറക്കേണ്ടത്.
അതേസമയം, ക്ഷേത്രത്തിന് മുകളില് കൂടി പറന്ന സ്വകാര്യ ഹെലികോപ്റ്ററിന്റെ കമ്പനിയോട് പൊലീസ് വിശദീകരണം തേടും. പരിശീലന പറക്കലായിരുന്നുവെന്നാണ് എയര് ട്രാഫിക് കണ്ട്രോള് റൂമില് നിന്നും പൊലീസിന് ലഭിച്ചിട്ടുള്ള വിവരം. ആരൊക്കെയായിരുന്നു ഹെലികോപ്റ്ററില് ഉണ്ടായിരുന്നത് എന്നും എന്താണ് ഉദ്ദേശം എന്ന കാര്യത്തിലെല്ലാം ഇനി അന്വേഷണം നടക്കേണ്ടതുണ്ടെന്ന് പൊലീസ് പറയുന്നു.
Discussion about this post