ഉപയോഗിക്കാതെ നിഷ്ക്രിയമായി കിടക്കുന്ന അക്കൗണ്ടുകൾ ഡിലീറ്റ് ചെയ്യാനായി ഒരുങ്ങുകയാണ് ഗൂഗിൾ. ഇക്കഴിഞ്ഞ മെയ് മാസത്തിൽ തന്നെ നിഷ്ക്രിയ അക്കൗണ്ടുകളെ കുറിച്ചുള്ള നയം കമ്പനി വ്യക്തമാക്കിയിരുന്നെങ്കിലും എന്നുമുതലാണ് ഇത്തരം അക്കൗണ്ടുകൾ ഡിലീറ്റ് ചെയ്യപ്പെടുക എന്ന് അറിയിച്ചിരുന്നില്ല. ഇപ്പോൾ ലഭിക്കുന്ന വിവരങ്ങൾ പ്രകാരം ഡിസംബർ 31 മുതൽ ഗൂഗിൾ നിഷ്ക്രിയ അക്കൗണ്ടുകൾ ഡിലീറ്റ് ചെയ്യാനായി ആരംഭിക്കും എന്നാണ് അറിയാൻ കഴിയുന്നത്.
രണ്ടുവർഷത്തോളമായി ഉപയോഗിക്കാതെ കിടക്കുന്ന ഗൂഗിൾ അക്കൗണ്ടുകൾ ആയിരിക്കും ഇത്തരത്തിൽ ഡിലീറ്റ് ചെയ്യപ്പെടുക. സൈബർ ഭീഷണികളും ദുരുപയോഗങ്ങളും തടയാനാണ് ഇത്തരത്തിൽ നിഷ്ക്രിയ അക്കൗണ്ടുകൾ നീക്കം ചെയ്യുന്നത് എന്നാണ് ഗൂഗിൾ പറയുന്നത്. ഗൂഗിൾ അക്കൗണ്ടുകൾ കൂടുതൽ കാലം നിഷ്ക്രിയമായി തുടരുന്നത് ഹാക്ക് ചെയ്യപ്പെടാൻ സാധ്യത ഉണ്ടാക്കുന്നു എന്നാണ് ഗൂഗിൾ പ്രൊഡക്ട് മാനേജ്മെന്റ് വൈസ് പ്രസിഡന്റ് റൂത്ത് ക്രിചെലി ഈ വിഷയവുമായി ബന്ധപ്പെട്ട് അറിയിച്ചത്.
ജിമെയിൽ, ഡ്രൈവ്, ഡോക്സ്, ഗൂഗിൾ മീറ്റ്, ഫോട്ടോസ്, കലണ്ടർ എന്നിങ്ങനെയുള്ള ഗൂഗിൾ അക്കൗണ്ടുകളാണ് നിഷ്ക്രിയമാണെങ്കിൽ ഡിലീറ്റ് ചെയ്യപ്പെടുക. കഴിഞ്ഞ രണ്ടു വർഷത്തിനുള്ളിൽ നിങ്ങൾ ഈ അക്കൗണ്ടുകളിൽ ഒരിക്കൽ പോലും സൈൻ ഇൻ ചെയ്തിട്ടില്ലെങ്കിൽ ആണ് ഡിലീറ്റ് ചെയ്യപ്പെടാൻ സാധ്യത ഉള്ളത്. അക്കൗണ്ടും ഡാറ്റയും പൂർണമായി ഇല്ലാതാക്കുന്നതിന് മുമ്പ് ഉപഭോക്താവിന്റെ അക്കൗണ്ടിലേക്കും വീണ്ടെടുക്കൽ ഇമെയിൽ വിലാസത്തിലേക്കും ഇമെയിൽ അയച്ച് മുന്നറിയിപ്പ് നൽകുമെന്നും ഗൂഗിൾ അറിയിച്ചിട്ടുണ്ട്.
Discussion about this post