വാഷിംഗ്ടണ്‍ ഡിസി : യു എസ് പ്രസിഡന്റ് തെരഞ്ഞെടുപ്പ് കേസ് വിചാരണയ്ക്കായി നിയമതിനായ ജഡ്ജിനെ മാറ്റുകയും വിചാരണ വാഷിംഗ്ടണിന് പുറത്ത് മറ്റൊരു കോടതിയിലേക്ക് മാറ്റണമെന്നും ആവശ്യപ്പെട്ട് മുന്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. തന്റെ ട്രൂത്ത് സോഷ്യല്‍ മീഡിയ അക്കൗണ്ടിലൂടെയാണ് ട്രംപ് ഇക്കാര്യം വ്യക്തമാക്കിയത്. കേസില്‍ ഇപ്പോള്‍ നിയോഗിക്കപ്പെട്ട ജഡ്ജി താന്യ ചുത്ക്കാനില്‍ നിന്നും തനിക്ക് നീതിയുക്തമായ വിചാരണ ലഭിക്കാന്‍ യാതൊരു വഴിയുമില്ലെന്നാണ് ട്രംപിന്റെ ആരോപണം. ഫെഡറല്‍ കേസിന്റെ മേല്‍നോട്ടം വഹിക്കാന്‍ മറ്റൊരു ജഡ്ജിയെ സമീപിക്കാനും കേസ് മറ്റൊരു സ്ഥലത്തേക്ക് മാറ്റണമെന്നുമാണ് ആവശ്യം.
ഡി സി നഗരത്തിലെ കോടതിയില്‍ നടക്കുന്ന വിചാരണയില്‍ തനിക്ക് ന്യായമായ വിചാരണ ലഭിക്കില്ല. ബൈഡന്‍ ഭരണത്തില്‍ വാഷിംഗ്ടണ്‍ ഡിസിയില്‍ കൊലപാതകങ്ങള്‍ ഇതുവരെയുള്ള എല്ലാ റെക്കോര്‍ഡുകളും തകര്‍ത്തു കൂടുന്നു. നഗരത്തിന്റെ ഇപ്പോഴത്തെ അരക്ഷിതാവസ്ഥയില്‍ ഭയന്ന് വിനോദസഞ്ചാരികള്‍ അവിടെ നിന്ന് പലായനം ചെയ്യുകയാണെന്നും അദ്ദേഹം കുറ്റപ്പെടുത്തി. തനിക്കെതിരായ കേസ് വര്‍ഷങ്ങള്‍ക്ക് മുമ്പ് ഉന്നയിക്കാമായിരുന്നെന്നും എന്നാല്‍ തിരഞ്ഞെടുപ്പ് പ്രചാരണത്തിന്റെ മധ്യത്തില്‍ തന്നെ മനപൂര്‍വ്വം കൊണ്ടുവന്നതാണെന്നും ട്രംപ് പറഞ്ഞു.
‘നിങ്ങള്‍ അമേരിക്കയെ നിരീക്ഷിക്കുകയാണെന്ന് ഞാന്‍ പ്രതീക്ഷിക്കുന്നു. നമ്മുടെ രാജ്യം നശിപ്പിക്കപ്പെടുകയാണ്. അമേരിക്കയെ വീണ്ടും മഹത്തരമാക്കൂ’, അദ്ദേഹം മറ്റൊരു പോസ്റ്റില്‍ പറയുന്നു.
അതേസമയം, 2021 ജനുവരി 6 ന് യുഎസ് ക്യാപിറ്റലില്‍ അതിക്രമിച്ച് കയറിയ ട്രംപ് അനുകൂലികള്‍ക്ക് കഠിനമായ ശിക്ഷ നല്‍കി എന്ന നിലയില്‍ പ്രസിദ്ധയാണ് നിലവില്‍ കേസിന്റെ അദ്ധ്യക്ഷത വഹിക്കുന്ന ജഡ്ജി താന്യ ചുത്ക്കാന്‍. മുന്‍ പ്രസിഡന്റ് ബരാക് ഒബാമയാണ് അവരെ ബെഞ്ചിലേക്ക് നാമനിര്‍ദ്ദേശം ചെയ്തത്.
അമേരിക്കന്‍ പ്രസിഡന്റ് തിരഞ്ഞെടുപ്പ് അട്ടിമറിക്കാന്‍ ശ്രമിച്ചു എന്ന കുറ്റത്തില്‍ അമേരിക്കന്‍ മുന്‍ പ്രസിഡന്റ് ഡൊണാള്‍ഡ് ട്രംപിനെതിരെ നാല് ക്രിമിനില്‍ കുറ്റങ്ങളാണ് ചുമത്തിയിട്ടുള്ളത്.
