ന്യൂഡൽഹി : ഇന്ത്യ 77-ാമത് സ്വാതന്ത്ര്യ ദിനാഘോഷത്തിന്റെ നിറവിലാണ്. രാജ്യമെങ്ങും വിപുലമായ ആഘോഷങ്ങളാണ് നടന്നുവരുന്നത്. ഇന്ത്യയുടെ സ്വാതന്ത്ര്യ ദിനത്തിൽ പ്രധാനമന്ത്രി നരേന്ദ്ര മോദിക്ക് വിവിധ രാജ്യങ്ങളിലെ നേതാക്കൾ ആശംസകൾ നേർന്നു.
ഫ്രഞ്ച് പ്രസിഡന്റ് ഇമ്മാനുവൽ മാക്രോൺ, മാലിദ്വീപ് പ്രസിഡന്റ് ഇബ്രാഹിം മുഹമ്മദ് സോലിഹ്, നേപ്പാൾ പ്രധാനമന്ത്രി പുഷ്പ കമൽ ദഹൽ പ്രചണ്ഡ, ഭൂട്ടാൻ പ്രധാനമന്ത്രി ലോട്ടെ ഷെറിങ് എന്നിവരുൾപ്പെടെയുള്ള വിവിധ ലോകനേതാക്കൾ എക്സ് ഹാൻഡിലിലൂടെ ഇന്ത്യൻ ജനതയ്ക്കും പ്രധാനമന്ത്രി നരേന്ദ്രമോദിക്കും സ്വാതന്ത്ര്യദിന ആശംസകൾ ട്വീറ്റ് ചെയ്തു. ഈ ലോക നേതാക്കളുടെ ആശംസകൾക്ക് മോദി നന്ദി അറിയിക്കുകയും ചെയ്തിട്ടുണ്ട്.
“നിങ്ങളുടെ സ്വാതന്ത്ര്യദിനത്തിൽ ഇന്ത്യൻ ജനതയ്ക്ക് അഭിനന്ദനങ്ങൾ! ഒരു മാസം മുമ്പ് പാരീസിൽ വെച്ച്, ഞാനും എന്റെ സുഹൃത്ത് നരേന്ദ്ര മോദിയും ഇന്ത്യയുടെ സ്വാതന്ത്ര്യത്തിന്റെ ശതാബ്ദി വർഷമായ 2047-ലേക്കായുള്ള ഇരു രാജ്യങ്ങളുടെയും പുതിയ കാഴ്ചപ്പാടുകൾ അവതരിപ്പിച്ചിരുന്നു. ഇന്ത്യക്ക് ഫ്രാൻസിനെ എപ്പോഴും സുഹൃത്തും പങ്കാളിയും ആയ വിശ്വസ്ത രാജ്യമായി കണക്കാക്കാം.” എന്നാണ് ഫ്രഞ്ച് പ്രസിഡണ്ട് ഇമ്മാനുവൽ മാക്രോൺ ട്വീറ്റ് ചെയ്തത്.
ഫ്രഞ്ച് പ്രസിഡന്റിന്റെ ആശംസയ്ക്ക് മറുപടിയായി പ്രധാനമന്ത്രി മോദി “പ്രസിഡന്റ് ഇമ്മാനുവൽ മാക്രോൺ, താങ്കളുടെ നല്ല ആശംസകൾക്ക് നന്ദി. പാരീസ് സന്ദർശനം ഞാൻ സ്നേഹപൂർവ്വം ഓർക്കുന്നു, ഇന്ത്യ-ഫ്രാൻസ് ബന്ധം വർദ്ധിപ്പിക്കുന്നതിനുള്ള നിങ്ങളുടെ അഭിനിവേശത്തെ അഭിനന്ദിക്കുന്നു” എന്ന് പ്രതികരിച്ചു.
സ്വാതന്ത്ര്യദിനം ആഘോഷിക്കുന്ന ഇന്ത്യയ്ക്കും പ്രസിഡന്റ് ദ്രൗപതി മുർമുവിനും പ്രധാനമന്ത്രി മോദിക്കും ഇന്ത്യയിലെ ജനങ്ങൾക്കും മാലിദ്വീപിന്റെ സർക്കാരിന്റെയും ജനങ്ങളുടെയും തന്റെയും ആശംസകൾ എന്ന് മാലിദ്വീപ് പ്രസിഡന്റ് ഇബ്രാഹിം മുഹമ്മദ് സോലിഹ് അറിയിച്ചു. ഇന്ത്യ എപ്പോഴും ശാശ്വതമായ സ്വാതന്ത്ര്യവും സമൃദ്ധിയും കൊണ്ട് അനുഗ്രഹിക്കപ്പെടട്ടെ എന്നും അദ്ദേഹം ആശംസിച്ചു. നേപ്പാളിന്റെയും ഭൂട്ടാന്റെയും പ്രധാനമന്ത്രിമാരും ഇന്ത്യയ്ക്ക് ആശംസകൾ നേർന്നു.
