ശ്രീനഗർ : ലണ്ടൻ വേൾഡ് ബുക്ക് ഓഫ് റെക്കോർഡ്സിൽ ഇടം നേടി ഒരു അഭിമാനകരമായ നേട്ടം സ്വന്തമാക്കിയിരിക്കുകയാണ് കശ്മീരിലെ ടുലിപ് ഉദ്യാനം. ഏഷ്യയിലെ ഏറ്റവും വലിയ ടുലിപ് ഉദ്യാനം എന്ന റെക്കോർഡ് ആണ് കശ്മീരിലെ ഇന്ദിരാഗാന്ധി മെമ്മോറിയൽ ടുലിപ് ഗാർഡൻ സ്വന്തമാക്കിയിരിക്കുന്നത്. 68 ഇനങ്ങളിൽ പെട്ട 15 ലക്ഷത്തിലേറെ ടുലിപ് ചെടികളാണ് ഈ ഉദ്യാനത്തിൽ ഒരുക്കിയിട്ടുള്ളത്. 2007 ൽ സ്ഥാപിക്കപ്പെട്ട ഈ ഉദ്യാനം ആദ്യം മോഡൽ ഫ്ലോറികൾച്ചർ സെന്റർ എന്നായിരുന്നു അറിയപ്പെട്ടിരുന്നത്.
ശ്രീനഗറിലെ സബർവാൻ പർവതനിരയുടെ താഴ്വരയിലാണ് ഈ മനോഹരമായ ഉദ്യാനം സ്ഥിതി ചെയ്യുന്നത്. 74 ഏക്കർ വിസ്തൃതിയിൽ ഒരുക്കിയിരിക്കുന്ന ഒരു മനോഹരമായ പൂന്തോട്ടമാണിത്. ആംസ്റ്റർഡാമിലെ ക്യൂകെൻഹോഫ് ഉദ്യാനത്തിൽ നിന്നുമാണ് ഈ പൂന്തോട്ടം നിർമ്മിക്കാൻ ആവശ്യമായ ടുലിപ് തൈകൾ കൊണ്ടുവന്നത്. 2023 മാർച്ച് മുതൽ ഏപ്രിൽ വരെയുള്ള ഒരു മാസത്തിനിടെ 3,000 വിദേശ സഞ്ചാരികളടക്കം 3,65,000 വിനോദസഞ്ചാരികൾ സന്ദർശിച്ചതിന്റെ റെക്കോർഡ് നേട്ടവും ഈ ടുലിപ് ഉദ്യാനം സ്വന്തമാക്കിയിരുന്നു. ടുലിപ് ചെടികൾ കൂടാതെ ഹയാസിന്ത്സ് , ഡാഫോഡിൽസ് , റാൻകുലസ് എന്നിവയുൾപ്പെടെ മറ്റു 46 ഇനം പൂച്ചെടികളും ഈ ഉദ്യാനത്തിൽ ഉണ്ട്.
ശനിയാഴ്ച ടുലിപ് ഉദ്യാനത്തിൽ നടന്ന ചടങ്ങിൽ ജമ്മു കശ്മീർ ഭരണകൂടത്തിന്റെ ഫ്ളോറികൾച്ചർ, ഗാർഡൻസ്, പാർക്കുകൾ എന്നിവയുടെ ചുമതലയുള്ള സെക്രട്ടറി ഫയാസ് ഷെയ്ഖ് ആണ് വേൾഡ് ബുക്ക് പ്രസിഡന്റും സിഇഒയുമായ സന്തോഷ് ശുക്ലയിൽ നിന്നും റെക്കോർഡ് നേട്ടത്തിന്റെ സർട്ടിഫിക്കറ്റ് സ്വീകരിച്ചത് . വേൾഡ് ബുക്ക് എഡിറ്റർ ദിലീപ് എൻ പണ്ഡിറ്റ്, ജമ്മു കശ്മീർ ഫ്ലോറി കൾച്ചർ ഡയറക്ടർ, മറ്റ് ഉദ്യോഗസ്ഥർ, ഉദ്യാന ജീവനക്കാർ എന്നിവരും ചടങ്ങിൽ പങ്കെടുത്തു. ഉദ്യാനത്തിന്റെ മഹത്വം അംഗീകരിച്ച വേൾഡ് ബുക്ക് ടീമിന് ഫയാസ് ഷെയ്ഖ് അഗാധമായ നന്ദി രേഖപ്പെടുത്തി.
Discussion about this post