ന്യൂഡല്‍ഹി : അചഞ്ചലമായ ദൃഢനിശ്ചയത്തിന്റേയും ആത്മവിശ്വാസത്തിന്റേയും മൂര്‍ത്തീ ഭാവങ്ങളാണ് ഭാരത സ്ത്രീകളെന്ന് രാഷ്ട്രപതി ദ്രൗപദി മുര്‍മ്മു. ഏത് കഠിന സാഹചര്യത്തിലും ഉയര്‍ത്തെണീറ്റ് ലോകം കൈപ്പിടിയിലൊതുക്കാന്‍ സ്ത്രീകള്‍ക്ക് അപാരമായ കഴിവാണ്. ഭാരതത്തില്‍ സ്ത്രീകളുടെ ഉയര്‍ച്ചയ്ക്ക് പ്രത്യേക സ്ഥാനമാണെന്നും രാഷ്ട്രപതി പറഞ്ഞു. ആര്‍മി വൈവ്സ് വെല്‍ഫെയര്‍ അസോസിയേഷന്‍ (എഡബ്ല്യുഡബ്ല്യുഎ) മനേക്ഷാ സെന്ററില്‍ നടത്തിയ പരിപാടിയില്‍ സംസാരിക്കുകയായിരുന്നു രാഷ്ട്രപതി.
മിസൈല്‍ മുതല്‍ സംഗീതം വരെ ഏത് മേഖലയിലും കരുത്ത് തെളിയിച്ചവരാണ് ഭാരത സ്ത്രീകള്‍. രാജ്യത്തിന്റെ ഉയര്‍ച്ചയ്ക്കും ഉന്നമനത്തിനും വളരെയധികം പ്രയത്‌നിക്കുന്നവരാണ് അവര്‍. അതിനാലാണ് നാരീ ശക്തി എന്ന് നമ്മള്‍ ബഹുമാനപൂര്‍വ്വം പറയുന്നത്. സ്ത്രീകളുടെ കഷ്ടപ്പാടുകള്‍ ഒരിക്കലും കാണാതെ പോകരുത്. നിരവധി പ്രതിബന്ധങ്ങളെ തരണം ചെയ്താണ് അവര്‍ ഓരോ നേട്ടങ്ങളും കൈവരിക്കുന്നത് എന്നും രാഷ്ട്രപതി പറഞ്ഞു.
നമ്മുടെ സമൂഹത്തിന്റെയും രാജ്യത്തിന്റെയും പുരോഗതിയില്‍ മുഖ്യ പങ്ക് വഹിക്കുന്നത് സ്ത്രീകളാണ്. വിജയിച്ച ഓരോ പുരുഷനും പിന്നില്‍ ഒരു സ്ത്രീ ഉണ്ടെന്നാണ് പണ്ടത്തെ പഴഞ്ചൊല്ല് എങ്കില്‍ ഇന്നത് ‘എല്ലാ വിജയിച്ച പുരുഷനനൊപ്പവും ഒരു സ്ത്രീയുമുണ്ട്’, എന്നാണ്. സ്ത്രീകള്‍ രാജ്യത്തിന് നല്‍കിയ സംഭാവനകളില്‍ താന്‍ അഭിമാനിക്കുകയും നന്ദി അറിയിക്കുകയും ചെയ്യുന്നതായി രാഷ്ട്രപതി കൂട്ടിച്ചേര്‍ത്തു.
ഭാരതത്തിന്റെ രാഷ്ട്രപതി സ്ഥാനം അലങ്കരിക്കുന്ന ദ്രൗപദി മുര്‍മ്മു തന്നെയാണ് നാരീ ശക്തിയില്‍ മഹനീയ മാതൃക എന്ന് എഡബ്ല്യുഡബ്ല്യുഎ അധ്യക്ഷ അര്‍ച്ചന പാണ്ഡെ പറഞ്ഞു.
Discussion about this post