കൊച്ചി : മാസപ്പടി വിവാദത്തില് മുഖ്യമന്ത്രിയുടെ മകള് വീണയ്ക്കെതിരെയുള്ള മൂവാറ്റുപുഴ എംഎല്എ മാത്യു കുഴല്നാടന്റെ ആരോപണങ്ങളെ പിന്തുണച്ച് നടന് ജോയ് മാത്യു. വീണയുടെ കമ്പനി അനധികൃത ഇടപാടുകള് നടത്തിയെന്നും നികുതി വെട്ടിപ്പ് നടത്തിയെന്നതുമാണ് കുഴല്നാടന്റെ ആരോപണം. വിഷയത്തില് ആരോപണ പ്രത്യാരോപണങ്ങളുമായി രാഷ്ട്രീയ പോരുകള് മുറുകുമ്പോഴാണ് എംഎല്എയെ പിന്തുണച്ചും വീണയെ പരിഹസിച്ചും നടന് രംഗത്ത് വന്നിരിക്കുന്നത്. തന്റെ ഫേസ്ബുക്കിലൂടെയാണ് ജോയ് മാത്യു കുറിപ്പ് പങ്ക് വച്ചിരിക്കുന്നത്.
സേവനത്തിന് നികുതി ഈടാക്കുന്നത് അസംബന്ധമാണെന്നും അതിനോടുള്ള പ്രതിഷേധമായിട്ടാണ് ധീരയായ പെണ്കുട്ടി നികുതികള് അടയ്ക്കാത്തെതെന്നും അദ്ദേഹം പരിഹസിച്ചു.
ഫെസ്ബുക്ക് കുറിപ്പിന്റെ പൂര്ണ്ണ രൂപം:
‘സേവനത്തിനു നികുതി ഈടാക്കുക ‘ഹോ എന്തൊരു അസംബന്ധമാണത് ! അതിനോടുള്ള പ്രതിഷേധമായിട്ടാണ് ധീരയായ ഒരു പെണ്കൊടി മേല്പ്പറഞ്ഞ നികുതികള് അടക്കാന് തയ്യാറാവാതിരുന്നത് എന്ന് ശ്രീ മാത്യു കുഴല് നാടന് മനസ്സിലാക്കാതെ പോയി. ജിഎസ്ടി, ഐജിഎസ്ടി എന്നീ സേവന നികുതികള് മുതലാളിത്തത്തിലേക്ക് കുതിക്കുന്ന ഇന്ത്യയിലെ ജനങ്ങളെ കൊള്ളയടിക്കാനുള്ള ബൂര്ഷ്വാ ഏര്പ്പാടാണെന്ന് ആര്ക്കാണറിയാത്തത്!
സാധാരണക്കാരെ കൊള്ളയടിക്കുന്ന ബൂര്ഷ്വാ -മുതലാളിത്ത നയത്തിനെതിരെയുള്ള സമര കാഹളം ധീരയായ ഒരു പാവം പെണ്കുട്ടി മുഴക്കിയിട്ടും നമ്മുടെ പേടിച്ചു തൂറികളായ ഇ ബു ജി (ഇടത് ബുദ്ധി ജീവികള്)കളോ പണിയെടുത്ത് ജീവിക്കുന്നതില് വിശ്വാസമില്ലാത്ത വിപ്ലവ യുവജന പ്രസ്ഥാനക്കാരോ പിന്തുണക്കാത്തത് കഷ്ടം തന്നെ.
ആ ധീരവനിത കൊളുത്തിയ നികുതി വിരുദ്ധ വികാരം തീഷ്ണസമര ജ്വാലയായ് വളര്ത്തിയെടുക്കുകയും കേന്ദ്ര-സംസ്ഥാന സര്ക്കാരുകളുടെ നികുതി പിഴിയല് പരിപാടിയായ ജിഎസ്ടി, ഐജിഎസ്ടി ചൂഷണങ്ങളില് നിന്നും വിമോചിപ്പിക്കുകയുമല്ലേ സത്യത്തില് നാം ചെയ്യേണ്ടത്? അങ്ങിനെയെങ്കില് എന്റെ പിന്തുണ ഇപ്പോള് തന്നെ ഇതാ റൊക്കമായി (ജിഎസ്ടി, ഐജിഎസ്ടി എന്നിവ ഇല്ലാതെ) തരുന്നു. അല്ലാതെ കുഴല്നാടന്റെ വീട്ടുപടിക്കല് പോയി നാലു മുദ്രാവാക്യം വിളിച്ചത് കൊണ്ട് ഒരു കാര്യവുമില്ല. അയാള് മുതലാളിത്ത പാതയും സാമ്രാജ്യത്വ പാതയും കൂട്ടിമുട്ടിക്കാനായി ഉമ്മറത്തെ തിണ്ണയിലിരുന്നു ചായകുടിച്ചും പത്രം വായിച്ചും നമ്മള് വിപ്ലവകാരികളെ നാണം കെടുത്തുകയാണ്. അത് അയാളുടെ തന്ത്രമാണ്, നമ്മള് വിപ്ലവകാരികള് അതില് വീണുപോകരുത്. മിത്തിനോട് കളിച്ചപോലെ അയാളോട് കളിക്കേണ്ട അയാള് ഒരു മിത്തല്ല, ആശയം ഭൗതിക ശക്തിയായി പരിണമിപ്പിച്ച കൊടും ഭീകരനാണയാള്.
അതിനാല് ജിഎസ്ടി, ഐജിഎസ്ടിക്കെതിരെ ധീരമായി നിലപാടെടുത്ത ആ സ്ത്രീ രത്നത്തെ പിന്തുണക്കുക. സമരം ആളിക്കത്തിക്കൂ. എന്നിട്ട് വേണം ആളുന്ന ജ്വാലയില് നിന്നും എനിക്കൊരു ബീഡി കത്തിച്ചു വലിച്ചു രസിക്കാന്!
Discussion about this post