തിരുവനന്തപുരം: സംസ്ഥാനത്ത് വരും മണിക്കൂറുകളിൽ ഉയർന്ന താപനില അനുഭവപ്പെടുമെന്ന മുന്നറിയിപ്പുമായി കാലാവസ്ഥാ നിരീക്ഷണ കേന്ദ്രം. പുറത്തിറങ്ങുമ്പോൾ ജാഗ്രത പാലിക്കണമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ജില്ലകളിൽ താപനില നിലവിലുള്ളതിൽ നിന്നും രണ്ട് മുതൽ അഞ്ച് ഡിഗ്രിവരെ ഉയരാൻ സാദ്ധ്യതയുണ്ടെന്നാണ് പ്രവചനം.
താപനില ഉയരുന്ന സാഹചര്യത്തിൽ ആറ് ജില്ലകളിലാണ് മുന്നറിയിപ്പ് പുറപ്പെടുവിച്ചിരിക്കുന്നത്. കൊല്ലം ജില്ലയിലാകും ഉയർന്ന താപനില അനുഭവപ്പെടുക. കൊല്ലത്ത് താപനില 36 ഡിഗ്രി സെൽഷ്യസ് വരെ ഉയർന്നേക്കാം. കോട്ടയത്ത് 35 ഡിഗ്രി സെൽഷ്യസ് വരെ താപനില വർദ്ധിക്കും. ആലപ്പുഴ, കണ്ണൂർ, പത്തനംതിട്ട ജില്ലകളിൽ 34 ഡിഗ്രി സെൽഷ്യസ് വരെയും തിരുവനന്തപുരം ജില്ലയിൽ 33 ഡിഗ്രി സെൽഷ്യസ് വരെയും താപനിലയിൽ വർദ്ധനവ് ഉണ്ടാകുമെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കി.
ഇന്നലെയും മിനിഞ്ഞാന്നും സംസ്ഥാനത്ത് ശക്തമായ ചൂടാണ് അനുഭവപ്പെട്ടിരുന്നത്. നാളെയും സമാന സ്ഥിതി തുടർന്നേക്കാമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം. ശക്തമായ ചൂട് അനുഭവപ്പെടുന്ന സാഹചര്യത്തിൽ പൊതജനങ്ങൾക്കായി ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്.
Discussion about this post