ദോഹ : ഖത്തറില് കോവിഡ്-19 പുതിയ വകഭേദമായ ഇജി 5 കണ്ടെത്തിയതായി ആരോഗ്യ മന്ത്രാലയം സ്ഥിരീകരിച്ചു. എന്നാല് ജനങ്ങള് ആശങ്കപ്പെടേണ്ടതില്ലെന്നും ആദ്യ കേസ് രേഖപ്പെടുത്തിയതു മുതല് സ്ഥിതിഗതികള് നിരീക്ഷിച്ചുവരികയാണെന്നും മന്ത്രാലയം വ്യക്തമാക്കി.
പരിമിതമായ കേസുകളാണ് നിലവില് റിപ്പോര്ട്ട് ചെയ്യപ്പെട്ടിട്ടുള്ളത്. പക്ഷെ ആരെയും ചികിത്സയ്ക്കായി ആശുപത്രിയില് അഡ്മിറ്റ് ചെയ്തിട്ടില്ല. സാംപിളുകള് പരിശോധനയ്ക്ക് അയച്ചിട്ടുണ്ടെന്നും രോഗം സ്ഥിരീകരിച്ചവരുടെ ആരോഗ്യനില തൃപ്തികരമാണെന്നും അധികൃതര് വിശദീകരിച്ചു. ഖത്തറിലെ ആരോഗ്യസ്ഥിതി ഭദ്രമാണെന്നും പകര്ച്ചവ്യാധി സാഹചര്യങ്ങള് സൂക്ഷ്മമായി നിരീക്ഷിച്ചുവരികയാണെന്നും ആരോഗ്യ മന്ത്രാലയത്തിലെ ഹെല്ത്ത് പ്രൊട്ടക്ഷന് ആന്ഡ് കമ്മ്യൂണിക്കബിള് ഡിസീസ് കണ്ട്രോള് വിഭാഗം ഡയറക്ടര് ഡോ. ഹമദ് അല് റുമൈഹി ഖത്തര് ടെലിവിഷന് നല്കിയ അഭിമുഖത്തില് പറഞ്ഞു.
ലോകാരോഗ്യ സംഘടന ഈ മാസം ആദ്യമാണ് ഇജി 5 നെ പുതിയ കൊവിഡ് വകഭേദമായി പ്രഖ്യാപിക്കുന്നത്. ലോകത്തിന്റെ പലഭാഗത്തും ഇവ റിപ്പോര്ട്ട് ചെയ്യപ്പെട്ടതിനാല് രാജ്യങ്ങള് ജാഗ്രത പുലര്ത്തണമെന്ന് മുന്നറിയിപ്പ് നല്കിയിരുന്നു. ഫെബ്രുവരിയില് ആദ്യമായി കണ്ടെത്തിയ ഒമിക്രോണ് വകഭാദത്തിന്റെ മറ്റൊരു പതിപ്പാണ് ഇപ്പോള് കണ്ടെത്തിയ ഇജി 5.
ചൈന, യുഎസ്, കൊറിയ, ജപ്പാന്, കാനഡ, ഓസ്ട്രേലിയ, സിംഗപ്പൂര്, യുകെ, ഫ്രാന്സ്, പോര്ച്ചുഗല്, സ്പെയിന് എന്നിവയുള്പ്പെടെ ലോകമെമ്പാടുമുള്ള വിവിധ രാജ്യങ്ങളില് ഇജി.5 റിപ്പോര്ട്ട് ചെയ്തിട്ടുണ്ട്. ഗള്ഫ് രാജ്യങ്ങള് ഉള്പ്പെടെ അമ്പതിലധികം രാജ്യങ്ങളിലാണ് ഇതുവരെ രോഗബാധ കണ്ടെത്തിയിട്ടുള്ളത്.
