കോഴിക്കോട് : താമരശേരി അമ്പലമുക്കില്‍ പൊലീസുകാര്‍ക്ക് നേരെ ലഹരി സംഘത്തിന്റെ ആക്രമണം. ഇതുമായി ബന്ധപ്പെട്ട് രണ്ടുപേരെ പോലീസ് അറസ്റ്റ് ചെയ്തു. താമരശേരി കുടുക്കിലുമ്മാരം കയ്യേലികുന്നുമ്മല്‍ കെ.കെ.ദിപീഷ് (അമ്പട്ടന്‍ ദീപു-30), താമരശേരി തച്ചംപൊയില്‍ ഇരട്ടക്കുളങ്ങര വീട്ടില്‍ റജീന (പുഷ്പ-40) എന്നിവരാണ് പിടിയിലായത്. പൊലീസിനെ ആക്രമിച്ചശേഷം ഓടി രക്ഷപ്പെട്ട റജീന, ദിപീഷിന്റെ വീട്ടില്‍ ഒളിവില്‍ കഴിയുകയായിരുന്നു. ലഹരിമരുന്നിന് അടിമയായ ഇവരെ മുന്‍പ് 9 കിലോ കഞ്ചാവുമായി പോലീസ് പിടികൂടിയിരുന്നു.
കഴിഞ്ഞ ദിവസം അമ്പലമുക്ക് കരിമുണ്ടിയില്‍ മന്‍സൂറിന്റെ വീടിനുനേരെ നടന്ന അക്രമം സംബന്ധിച്ച് അന്വേഷിക്കാന്‍ എത്തിയ പൊലീസുകാരെയാണ് ലഹരിസംഘം ആക്രമിച്ചത്. പൊലീസിനു നേരെ കല്ലെറിഞ്ഞും നായ്ക്കളെ അഴിച്ചുവിട്ടുമായിരുന്നു ലഹരിസംഘത്തിന്റെ അഴിഞ്ഞാട്ടം. ഈ കേസില്‍ ഇതുവരെ 4 പേര്‍ അറസ്റ്റിലായി. മന്‍സൂറിന്റെ വീട്ടില്‍ സിസിടിവി സ്ഥാപിച്ചതില്‍ പ്രകോപിതരായാണ് ലഹരിസംഘം ആക്രമണം അഴിച്ചുവിട്ടത്.
Discussion about this post