തിരുവനന്തപുരം: മോട്ടോറോളയുടെ മോട്ടോ ജി 54 സ്മാർട്ട്‌ഫോൺ ഈ മാസം 13 ന് വിപണിയിലെത്തും. ഏറ്റവും കുറഞ്ഞ വിലയിൽ 12 ജിബി റാമും 256 ജിബി സ്റ്റോറേജുമുള്ള ഫോൺ എന്ന അവകാശവാദത്തോടെയാണ് മോട്ടോറോള ജി 54 വിപണിയിൽ ഇറക്കുന്നത്.
50 മെഗാപിക്‌സൽ പ്രധാന ക്യാമറയും എട്ട് മെഗാപിക്‌സൽ അൾട്രാ വൈഡ് ആംഗിൾ സെക്കന്ററി ക്യാമറയുമുള്ള ഫോണിൽ 16 എംപിയുടെ സെൽഫി ക്യാമറയാണുള്ളത്. നിരവധി ഫീച്ചറുകൾ അണി നിരത്തിയിട്ടുള്ള ഫോൺ ഫ്‌ലിപ്കാർട്ട്, മോട്ടോറോള ഒഫീഷ്യൽ വെബ്‌സൈറ്റ് എന്നിവയിലൂടെ 17,499 രൂപക്ക് ലഭിക്കും. റീട്ടെയ്ൽ ഔട്ട്‌ലറ്റുകളിലും ലഭ്യമാകും.
മീഡിയ ടെക്കിന്റെ ഡിമെൻസിറ്റി 7020 ഒക്ടോ കോർ എന്ന ശക്തമായ പ്രൊസസർ ഉപയോഗിക്കുന്ന ഇന്ത്യയിലെ ആദ്യ സ്മാർട്ട് ഫോണാണ് 4,5 ജി ബാന്റുകളുടെ പിന്തുണയുള്ള മോട്ടോ ജി 54. 120 ഹെഡ്‌സ് റിഫ്രഷ് റേറ്റ് ഉള്ള 6.5′ ഫുൾ എച്ച്.ഡി പ്ലസ് ഡിസ്‌പ്ലേയും ഡോൾബി അറ്റ്‌മോസും മികച്ച അനുഭവം നൽകും.
6000 എം.എ.എച്ച് ബാറ്ററിയുള്ള ഫോണിൽ 33 വാട്ടിന്റെ സൂപ്പർ ഫാസ്റ്റ് ചാർജിംഗ് സൗകര്യമുണ്ട്. 12 ജി.ബി റാം 256 ജി.ബി സ്റ്റോറേജ് വേരിയന്റിന് പുറമേ എട്ട് ജി.ബി റാം 128 ജി.ബി സ്റ്റോറേജ് വേരിയന്റും കമ്പനി പുറത്തിറക്കിയിട്ടുണ്ട്. 15,999 രൂപ വിലയുള്ള ഫോൺ ഓഫറുകൾ കൂടി ചേർത്ത് 14,999 രൂപക്കാണ് വിൽപ്പനക്കെത്തിച്ചിട്ടുള്ളത്.
എസ്ഡി കാർഡ് ഉപയോഗിച്ച് ഒരു ടിബി വരെ സ്റ്റോറേജ് ഉയർത്താൻ കഴിയുമെന്നതും രണ്ട് മോഡലുകളുടെയും സവിശേഷതയാണ്.
