മുംബൈ : ദി കശ്മീര് ഫയല്സിന്റെ വമ്പന് വിജയത്തിന് ശേഷം വിവേക് അഗ്നിഹോത്രി സംവിധാനം ചെയ്യുന്ന പുതിയ ചിത്രമാണ് ‘ദി വാക്സിന് വാര്’. ഇന്ത്യയുടെ കോവിഡ് പോരാട്ടത്തെ ആസ്പദമാക്കി ഒരുക്കുന്ന ചിത്രത്തിന്റെ ട്രെയിലര് ഇന്നലെ പുറത്തിറങ്ങി. സെപ്തംബര് 28ന് ചിത്രം തിയേറ്ററുകളിലെത്തും.
ഇന്ത്യയിലെ ആദ്യത്തെ ബയോ സയന്സ് സിനിമാറ്റിക് ഉദ്യമമാണ് ദി വാക്സിന് വാര്. കോവാക്സിന് വികസിപ്പിക്കുന്നതില് പ്രധാന പങ്കുവഹിച്ച ഇന്ത്യന് ശാസ്ത്രജ്ഞരുടെ സമര്പ്പണത്തെ തുറന്ന കാട്ടുകയാണ് സംവിധായകന് ചിത്രത്തിലൂടെ. കോവിഡ് പോരാട്ടത്തില് രാജ്യം നടത്തിയ ചെറുത്തുനില്പ്പിനെ കുറിച്ച് നിങ്ങള് അറിയാതിരുന്ന അവിശ്വസനീയമായ കഥ എന്നാണ് വിവേക് അഗ്നിഹോത്രി നേരത്തെ പറഞ്ഞത്.
പല്ലവി ജോഷി, അനുപം ഖേര്, നാനാ പടേകര്, റെയ്മ സെന്, ഗിരിജ, നിവേദിത ഭട്ടാചാര്യ, സപ്തമി ഗൗഡ, മോഹന് കൗപുര് എന്നിവരടക്കമുള്ളവരാണ് ചിത്രത്തില് പ്രധാന കഥാപാത്രങ്ങളെ അവതരിപ്പിക്കുന്നത്. ഹിന്ദി, ഇംഗ്ലീഷ്, ഗുജറാത്തി, പഞ്ചാബി, ഭോജ്പുരി, ബംഗാളി, മറാഠി, തെലുഗു, തമിഴ്, കന്നഡ, ഉറുദു എന്നീ 11 ഭാഷകളില് ചിത്രം റിലീസ് ചെയ്യും.
2023 ഓഗസ്റ്റ് 15ന് ചിത്രം വിവിധ ഭാഷകളില് എത്തും എന്നായിരുന്നു നേരത്തെ പ്രഖ്യാപിച്ചിരുന്നത്. എന്നാല് സാങ്കേതിക കാരണങ്ങളാല് ചിത്രത്തിന്റെ റിലീസ് നീട്ടി വയ്ക്കുകയായിരുന്നു. കൊവിഡ് 19നെ കുറിച്ചും രാജ്യത്തെ വാക്സിനേഷന് പ്രക്രിയയെ കുറിച്ചും ആസ്പദമാക്കിയാണ് ചിത്രം. ഐ ആം ബുദ്ധ പ്രൊഡക്ഷന്സും അഭിഷേക് അഗര്വാളും ചേര്ന്ന് അഗര്വാള് ആര്ട്ടിന്റെ ബാനറിലാണ് സിനിമ നിര്മിക്കുന്നത്.
Discussion about this post