ഓണ്‍ലൈന്‍ ഫുഡ് ഡെലിവറി ആപ്പുകളായ സ്വിഗ്ഗിയും സൊമാറ്റയുമൊക്കെ ഉപയോക്താക്കളില്‍ നിന്നും അമിത നിരക്ക് ഈടാക്കുന്നുവെന്ന സംശയം ഏറെക്കാലമായി ഉപയോക്താക്കള്‍ക്കിടയില്‍ നിലവിലുണ്ട്. കഴിഞ്ഞ ദിവസങ്ങളില്‍ X (മുമ്പത്തെ ട്വിറ്റര്‍) അടക്കമുള്ള സോഷ്യല്‍ മീഡിയ നെറ്റ്‌വര്‍ക്കുകളില്‍ പലരും ഇത് സംബന്ധിച്ച പരാതികള്‍ ഉന്നയിച്ചിരുന്നു. ഓര്‍ഡര്‍ തുകയിലെ ദശാംശങ്ങളും മറ്റും ഒഴിവാക്കുന്നതിനായി സ്വിഗ്ഗി കൂടുതല്‍ നിരക്ക് ഈടാക്കുന്നുവെന്നും ഓര്‍ഡര്‍ തുകയ്‌ക്കൊപ്പം 3 രൂപ കൂട്ടുന്നുവെന്നുമായിരുന്നു മിക്കവരുടെയും പരാതി. ഈ വിഷയത്തില്‍ വിശദീകരണവുമായി രംഗത്തെത്തിയിരിക്കുകയാണ് സ്വിഗ്ഗി. അത് ഒരു ടെക്‌നിക്കല്‍ ബഗ് മാത്രമായിരുന്നുവെന്നും ഓര്‍ഡര്‍ നല്‍കുമ്പോള്‍ ഉപയോക്താക്കളില്‍ നിന്നും ശരിയായ തുക മാത്രമേ ഈടാക്കുന്നുള്ളുവെന്നുമാണ് കമ്പനി വ്യക്തമാക്കിയിരിക്കുന്നത്.
മറ്റ് ഓണ്‍ലൈന്‍ ഇടപാടുകളില്‍ ഓര്‍ഡര്‍ മൂല്യത്തില്‍ പൈസ ഉണ്ടെങ്കില്‍ അത് അതുപോലെ ഈടാക്കുകയാണ് ചെയ്യുന്നതെന്നും എന്നാല്‍ സ്വിഗ്ഗി അധിക നിരക്ക് ഈടാക്കി പൈസയെ രൂപയിലേക്ക് എത്തിക്കുകയാണെന്നും പരാതിപ്പെട്ട് പലരും രംഗത്തെത്തിയിരുന്നു. സ്വിഗ്ഗിയുടെ ഓണ്‍ലൈന്‍ ബില്ലുകളും ഇതിന് തെളിവായി അവര്‍ പങ്കുവെച്ചിരുന്നു. സ്വിഗ്ഗി പോലൊരു വന്‍കിട ഡെലിവറി ആപ്പ് പത്ത് പൈസ അധികമായി ഈടാക്കിയാല്‍ പോലും അത് കോടികളായി മാറുമെന്ന വസ്തുതയും പരാതിക്കാര്‍ പങ്കുവെച്ചിരുന്നു. കാപ്പിറ്റല്‍ മൈന്‍ഡ് സ്ഥാപകനും സിഇഒയുമായ ദീപക് ഷേണായിയും സമാന അനുഭവം X ല്‍ പങ്കുവെച്ചു. തന്റെ ഓര്‍ഡര്‍ മൂല്യം 255.60 ആയിരുന്നുവെന്നും എന്നാല്‍ കമ്പനി ചാര്‍ജ് ചെയ്തത് 259 രൂപയാണെന്നും, 3 രൂപ എങ്ങനെ അധികമായി വന്നുവെന്നും എന്താണ് സംഭവിക്കുന്നതെന്നും ദീപക് ട്വീറ്റില്‍ ചോദിച്ചു. അതേസമയം അതൊരു ഡിസപ്ലേ എറര്‍ ആകാന്‍ സാധ്യതയുണ്ടെന്ന് മറ്റൊരു ട്വീറ്റില്‍ അദ്ദേഹം പറയുകയും ചെയ്യുന്നുണ്ട്.
ദീപകിന്‌റെ പോസ്റ്റിന് മറുപടി ആയാണ് അതൊരു സാങ്കേതിക പിഴവ് ആയിരുന്നുവെന്നും പരിഹരിച്ചുവെന്നും സ്വിഗ്ഗി വ്യക്തമാക്കിയത്. ഉപയോക്താക്കള്‍ കൂടുതല്‍ തുക നല്‍കേണ്ടിവന്നിട്ടില്ലെന്നും ഓര്‍ഡര്‍ പ്രകാരമുള്ള ശരിയായ തുകയാണ് കമ്പനി ഈടാക്കിയതെന്നും സ്വിഗ്ഗി അറിയിച്ചു.
Discussion about this post