ചെന്നൈ : വന്ദേ ഭാരതിൽ യാത്ര ചെയ്യുന്നവർക്ക് ഇഷ്ടാനുസരണം ഭക്ഷണവും ബുക്ക് ചെയ്യാനുള്ള സൗകര്യം ഏർപ്പെടുത്തി ഇന്ത്യൻ റെയിൽവേ. യാത്ര പുറപ്പെടുന്നതിനു 48 മണിക്കൂറിനു മുൻപ് ലഭിക്കുന്ന മൊബൈൽ എസ് എം എസിലെ ലിങ്ക് ഉപയോഗിച്ച് ഭക്ഷണത്തിനായി ബുക്ക് ചെയ്യാം. ട്രെയിൻ പുറപ്പെടുന്നതിന് മുൻപ് ടിക്കറ്റ് എടുത്തവർക്കും ഭക്ഷണം ബുക്ക് ചെയ്യാം.മുൻകൂട്ടി ബുക്ക് ചെയ്യാത്തതിനാൽ വെജിറ്റേറിയൻ ഭക്ഷണം ആയിരിക്കും ഇവർക്ക് ലഭിക്കുക. ബുക്ക് ചെയ്യാതെ എത്തുന്ന യാത്രക്കാർക്ക് ട്രെയിനിൽ ആ സമയത്ത് ലഭ്യമായ ഭക്ഷണങ്ങൾ ആയിരിക്കും വിതരണം ചെയ്യുക. പക്ഷെ അവർ 50 രൂപ അധികമായി നൽകേണ്ടി വരും.
നേരത്തെ വന്ദേ ഭാരതിൽ ടിക്കറ്റ് ബുക്ക് ചെയ്യുന്നതിനോടൊപ്പം ആയിരുന്നു ഭക്ഷണവും ബുക്ക് ചെയ്തിരുന്നത്. ടിക്കറ്റ് എടുക്കുന്ന സമയത്ത് ഭക്ഷണം ഒഴിവാക്കിയവർക്ക് പിന്നീട് ബുക്ക് ചെയ്യാനുള്ള സൗകര്യം ഉണ്ടായിരുന്നില്ല . ഇനി മുതൽ യാത്രക്കാർക്ക് ഭക്ഷണം എപ്പോൾ വേണമെങ്കിലും ബുക്ക് ചെയ്യാനുള്ള സൗകര്യം ലഭ്യമാകും. വന്ദേ ഭാരതിനുള്ളിൽ ആറു മാസത്തേക്ക് മറ്റുഭക്ഷണങ്ങളുടെ വില്പനയ്ക്ക് നിരോധനം ഏർപ്പെടുത്തിയിട്ടുണ്ട്. യാത്രക്കാരുടെ അസൗകര്യം ഒഴിവാക്കാനാണ് നിരോധനം ഏർപ്പെടുത്തിയത്. നിലവിൽ മറ്റു ട്രെയിനുകളിൽ ഐആർസിടിസി യുടെ ആപ്പ് ഉപയോഗിച്ച് റെയിൽവേ സ്റ്റേഷനിൽ നിന്നും റെയിൽവേയുമായി സഹകരിക്കുന്ന മറ്റു സ്വകാര്യ കടകളിൽ നിന്നും ഭക്ഷണം ബുക്ക് ചെയ്യാനുള്ള സംവിധാനം ഉണ്ട്.
വന്ദേ ഭാരത് ട്രെയിനിലെ ഭക്ഷണത്തെ സംബന്ധിച്ച പുതിയ വിവരങ്ങളെല്ലാം യാത്രക്കാർക്ക് എല്ലാ സ്റ്റേഷനുകളിലും അറിയിപ്പായി നൽകാൻ റെയിൽവേ നിർദ്ദേശം നൽകിയിട്ടുണ്ട്.
Discussion about this post