പേരാമ്പ്ര :സിപിഎം ഭരണത്തിലുള്ള ചെറുവണ്ണൂർ സഹകരണ ബാങ്കിലും വൻ ക്രമക്കേട് നടന്നതായി പരാതി. പണയം വെച്ച സ്വർണം ഇടപാടുകാർ അറിയാതെ തിരിമറി നടത്തി എന്നാണ് പരാതി. സംഭവത്തിൽ അന്വേഷണം ആവശ്യപ്പെട്ട് എന്‍ഫോഴ്സ്മെന്‍റ് ഡയറക്ടറേറ്റിന് പരാതി നൽകുമെന്ന് അഴിമതി വിരുദ്ധ സമിതി അറിയിച്ചു.
ചെറുവണ്ണൂർ സഹകരണ ബാങ്കിന്റെ മുയിപ്പോത്ത് ശാഖയില്‍ സ്വര്‍ണ്ണം പണയം വെച്ചതിൽ തിരിമറി നടനെന്ന പരാതി സഹകരണ സംഘം അസിസ്റ്റന്‍റ് രജിസ്ട്രാര്‍ക്ക് നൽകി. അഴിമതി വിരുദ്ധ സമിതി സെക്രട്ടറി എം കെ മുരളീധരനാണ് ക്രമക്കേടുകൾ നടനെന്ന് കാട്ടി പരാതി നൽകിയത്. പണയം വെച്ച സ്വര്‍ണ്ണം ഉടമസ്ഥർ അറിയാതെ പലരുടെയും മേൽവിലാസത്തിൽ പണയം വെച്ച് പണം തട്ടിയെടുത്തു എന്നാണ് പരാതിയിൽ പറയുന്നത്. ചെറുവണ്ണൂർ സഹകരണ ബാങ്കും സിപിഎം ഭരണത്തിലുള്ളതാണ്.
ക്രമക്കേട് നടന്ന വിവരം സഹകരണ വകുപ്പ് ഉദ്യോഗസ്ഥരെയോ പോലീസിനെയോ ബാങ്ക് ഇതുവരെ അറിയിച്ചിട്ടില്ല. ക്രമക്കേട് നടത്തിയ രണ്ടുപേർക്കെതിരെ നടപടി സ്വീകരിക്കുക മാത്രമാണ് ചെയ്തത്. ബാങ്കിന്റെ മറ്റു ശാഖകളായ ചെറുവണ്ണൂര്‍ , പന്നിമുക്ക്, ആവള തുടങ്ങിയ ബ്രാഞ്ചുകളിലും ക്രമക്കേടുകള്‍ നടന്നിട്ടുണ്ടെന്നാണ് പരാതി.
എന്നാൽ പരാതി അടിസ്ഥാന രഹിതമാണ്, ക്രമക്കേടുകൾ നടന്നിട്ടുണ്ടെങ്കിൽ അന്വേഷണം പൂർത്തിയാക്കിയ ശേഷം സഹകരണ വകുപ്പിനെ അറിയിച്ചാൽ മതിയെന്നാണ് ബാങ്ക് അധികൃതരുടെ വിശദീകരണം
Discussion about this post