എറണാകുളം: പ്ലസ് ടു വിദ്യാര്‍ഥിനിയെ പീഡിപ്പിച്ച് ഗര്‍ഭിണിയാക്കിയശേഷം വാല്‍പ്പാറയില്‍ കൊണ്ടുപോയി അതി ക്രൂരമായി കൊലപ്പെടുത്തിയ കേസില്‍ പ്രതി സഫര്‍ ഷായ്ക്കു ഇരട്ട ജീവപര്യന്തം. വിവിധ വകുപ്പുകളിലായി 2.5 ലക്ഷം രൂപ പിഴയും പ്രതി അടയ്ക്കണം. എറണാകുളം പോക്‌സോ കോടതിയാണ് വിധി പുറപ്പെടുവിച്ചത്. കൊലപാതകത്തിനും പോക്‌സോ നിയമപ്രകാരവുമാണ് ശിക്ഷ വിധിച്ചിട്ടുള്ളത്.
2020 ജനുവരി 7 നാണ് കേസിനാസ്പദമായ സംഭവം. കൊച്ചി കലൂരില്‍ നിന്ന് പ്ലസ്ടു വിദ്യാര്‍ഥിനിയെ പ്രതി സഫര്‍ ഷാ തട്ടിക്കൊണ്ടുപോയി കൊലപ്പെടുത്തുകയായിരുന്നു. സഫറുമായുള്ള പ്രണയത്തില്‍നിന്ന് പെണ്‍കുട്ടി പിന്‍മാറിയിരുന്നു. ഇതിനുശേഷം സ്‌കൂളിലേക്ക് പോകുന്നതിനിടെ കുറച്ചു കാര്യങ്ങള്‍ സംസാരിക്കാനുണ്ടെന്ന് പറഞ്ഞ് പെണ്‍കുട്ടിയെ കാറില്‍ കയറ്റികൊണ്ടുപോവുകയായിരുന്നു. തുടര്‍ന്ന് പീഡിപ്പിച്ച ശേഷം കാറില്‍ വെച്ച് ക്രൂരമായി കുത്തിക്കൊലപെടുത്തുകയായിരുന്നു.
തുടര്‍ന്ന് മൃതദേഹം വാല്‍പ്പാറയിലെ തേയിലത്തോട്ടത്തില്‍ ഉപേക്ഷിക്കുകയായിരുന്നു. കൊല്ലപ്പെടുമ്പോള്‍ പെണ്‍കുട്ടി നാലര മാസം ഗര്‍ഭിണിയായിരുന്നു. ഗര്‍ഭസ്ഥ ശിശുവിന്റെ പിതാവ് പ്രതി തന്നെയെന്ന് ഡിഎന്‍എ പരിശോധനയിലൂടെ വ്യക്തമായെന്നും അതിനാല്‍ തന്നെ പെണ്‍കുട്ടി പീഡിക്കപ്പെട്ടതാണെന്ന് തെളിഞ്ഞതായും കോടതി വിലയിരുത്തി.
മരടിലെ സര്‍വീസ് സെന്റര്‍ ജീവനക്കാരനായ സഫര്‍ ഷാ അവിടെനിന്ന് തട്ടിയെടുത്ത കാറിലാണ് പെണ്‍കുട്ടിയെ ക്കൊണ്ടുപോയി കൊലപ്പെടുത്തിയത്. പെണ്‍കുട്ടിയുടെ ശരീരത്തില്‍ മുപ്പത്തിലധികം മുറിവുണ്ടായിരുന്നു. കാര്‍ മോഷണവുമായി ബന്ധപ്പെട്ട് വാല്‍പ്പാറ ചെക്പോസ്റ്റില്‍ തടഞ്ഞാണ് പ്രതിയെ പിടികൂടിയത്.
Discussion about this post