ന്യൂഡൽഹി; ഹാങ്ചൗ ഏഷ്യൻ ഗെയിംസിൽ നൂറ് മെഡൽ തികച്ച ഇന്ത്യൻ സംഘത്തെ അഭിനന്ദിച്ച് പ്രധാനമന്ത്രി നരേന്ദ്രമോദി. ഏഷ്യൻ ഗെയിംസിലെ ഇന്ത്യയുടെ പ്രകടനത്തെ ‘നിർണായക നേട്ടം’ എന്ന് വിശേഷിപ്പിച്ച പ്രധാനമന്ത്രി നരേന്ദ്രമോദി, രാജ്യത്തിന്റെ വിജയത്തിൽ ഇന്ത്യയിലെ ജനങ്ങൾ ‘ആഹ്ലാദഭരിതരാണെന്ന്’ പറഞ്ഞു. താരങ്ങളുടെ വിസ്മയിപ്പിക്കുന്ന പ്രകടനങ്ങൾ ‘ചരിത്രം സൃഷ്ടിക്കുകയും രാജ്യത്തിന്റെ ഹൃദയങ്ങളിൽ അഭിമാനം നിറയ്ക്കുകയും ചെയ്തു’ എന്ന് പറഞ്ഞ അദ്ദേഹം അത്ലറ്റുകളെ അവരുടെ പരിശ്രമങ്ങളെ അഭിനന്ദിക്കുകയും ചെയ്തു. ഒക്ടോബർ 10-ന് കായികതാരങ്ങൾക്ക് വിരുന്നൊരുക്കുമെന്നും പ്രധാനമന്ത്രി അറിയിച്ചു. സോഷ്യൽമീഡിയ പ്ലാറ്റ്‌ഫോമായ എക്‌സിലൂടെയാണ് അഭിനന്ദനം.
ഏഷ്യൻ ഗെയിംസിൽ ഇന്ത്യക്ക് നിർണായക നേട്ടം! 100 മെഡലുകളുടെ ശ്രദ്ധേയമായ നാഴികക്കല്ലിൽ എത്തിയതിൽ ഇന്ത്യയിലെ ജനങ്ങൾ ആവേശഭരിതരാണ്. ഇന്ത്യയെ ഈ ചരിത്ര നാഴികക്കല്ലിലേക്ക് നയിച്ച നമ്മുടെ താരങ്ങളെ ഞാൻ ഹൃദയംഗമമായ അഭിനന്ദനങ്ങൾ അറിയിക്കുന്നു. പ്രചോദിപ്പിക്കുന്ന പ്രകടനം ചരിത്രം സൃഷ്ടിക്കുകയും ഞങ്ങളുടെ ഹൃദയങ്ങളിൽ അഭിമാനം നിറയ്ക്കുകയും ചെയ്തു. 10-ന് ഞങ്ങളുടെ ഏഷ്യൻ ഗെയിംസ് സംഘത്തിന് വിരുന്നൊരുക്കാനും ഞങ്ങളുടെ താരങ്ങളുമായി സംവദിക്കാനും ഞാൻ ആഗ്രഹിക്കുന്നു എന്നായിരുന്നു പ്രധാനമന്ത്രി എക്‌സിൽ കുറിച്ചത്.
ആതിഥേയരായ ചൈനീസ് ടീമിനെ തോൽപ്പിച്ചാണ് ഇന്ത്യയുടെ വനിതാ കബഡി ടീം
ഏഷ്യൻ ഗെയിംസിൽ രാജ്യത്തിന്റെ നൂറാം മെഡൽ സ്വന്തമാക്കിയത്. 2018ൽ ഇന്തോനേഷ്യയിൽ 16 സ്വർണവും 23 വെള്ളിയും 31 വെങ്കലവുമടക്കം 70 മെഡലുകൾ നേടിയതാണ് ഏഷ്യൻ ഗെയിംസിലെ ഇന്ത്യയുടെ മുൻ റെക്കോർഡ്
Discussion about this post