മുംബൈ : ബോളിവുഡ് സൂപ്പര്‍ താരം ഷാരൂഖ് ഖാന് വൈ പ്ലസ് കാറ്റഗറി സുരക്ഷ ഏര്‍പ്പെടുത്തി മഹാരാഷ്ട്ര പോലീസ്. പഠാന്‍, ജവാന്‍ എന്നീ ചിത്രങ്ങളുടെ വമ്പന്‍ വിജയത്തിന് പിന്നാലെയാണ് താരത്തിനെതിരെ വധ ഭീഷണി വര്‍ദ്ധിച്ചത്. ഇനി മുതല്‍ ഷാരൂഖിന്റെ രാജ്യത്തിനകത്തുള്ള എല്ലാ യാത്രകളും കമാന്റോകളുടെ സുരക്ഷാവലയത്തിലായിരിക്കുമെന്ന് അധികൃതര്‍ അറിയിച്ചു.
താരത്തിന്റെ ജീവന് ഭീഷണി വര്‍ധിച്ചുവെന്ന ഇന്റലിജന്‍സ് റിപ്പോര്‍ട്ടിനെ തുടര്‍ന്നാണ് ശക്തമായ സുരക്ഷ ഉറപ്പ് വരുത്താന്‍ മഹാരാഷ്ട്ര പോലീസ് തീരുമാനിക്കുന്നത്. സുരക്ഷയുടെ ഭാഗമായി ഷാരൂഖിനൊപ്പം മഹാരാഷ്ട്ര പൊലീസിന്റെ സ്‌പെഷ്യല്‍ പ്രൊട്ടക്ഷന്‍ ടീമിലുള്ള ആറ് സായുധ പൊലീസ് കമാന്റോകള്‍ ഉണ്ടാകും. എംപി 5 യന്ത്രത്തോക്കുകള്‍, എകെ 47 ആക്രമണ റൈഫിളുകള്‍, ഗ്ലോക്ക് പിസ്റ്റളുകള്‍ എന്നിവയാണ് കമാന്റോകളുടെ ആയുധം.
മുംബൈയിലെ ഷാരൂഖിന്റെ വസതിയായ മന്നത്തിനും പോലീസ് സുരക്ഷ ഏര്‍പ്പെടുത്തിയിട്ടുണ്ട്. മുഴുവന്‍ സമയവും നാല് പൊലീസുകാരുടെ കാവലിലായിരിക്കും ഇനി മുതല്‍ മന്നത്ത്. സുരക്ഷയ്ക്കുള്ള പണം നല്‍കുന്നത് ഷാരൂഖ് തന്നെയാണെന്നും അധികൃതര്‍ വ്യക്തമാക്കി.
ഇന്ത്യയില്‍, സ്വകാര്യ സുരക്ഷയ്ക്ക് ആയുധങ്ങള്‍ അനുവദിനീയമല്ല, അതിനാലാണ് പോലീസ് സുരക്ഷ നല്‍കേണ്ടത്. വിഐപി സെക്യൂരിറ്റി വിഭാഗത്തിലെ സ്‌പെഷ്യല്‍ ഐജിപി ദിലീപ് സാവന്താണ് ഷാരൂഖ് ഖാന് സുരക്ഷാ ഭീഷണിയുള്ളതായി അറിയിച്ചത്.
ബോളിവുഡില്‍ തുടര്‍ച്ചയായി രണ്ട് വമ്പന്‍ ഹിറ്റുകളാണ് ഷാരൂഖിന്റേതായി ഈ വര്‍ഷം പുറത്തിറങ്ങിയത്. ജവാന്‍ ഇന്ത്യയില്‍ മാത്രം 618.83 കോടി രൂപയാണ് നേടിയത്. ആഗോളതലത്തില്‍ പഠാന്‍ നേടിയതാകട്ടെ 1,103 കോടിയും. ഈ വര്‍ഷം തുടക്കത്തില്‍ പുറത്തിറങ്ങിയ പഠാന്‍ ഇന്ത്യയില്‍ 543.05 കോടിയും ആഗോളതലത്തില്‍ 1,050.3 കോടി രൂപയും കളക്ഷന്‍ നേടി.
ഉയര്‍ന്ന ഭീഷണി നേരിടുന്നവര്‍ക്കാണ് വൈ പ്ലസ് സുരക്ഷ അനുവദിക്കുന്നത്. ലോറന്‍സ് ബിഷ്ണോയിയുടെ സംഘം വധഭീഷണി ഉയര്‍ത്തിയതിന് പിന്നാലെ നടന്‍ സല്‍മാന്‍ ഖാന് വൈ പ്ലസ് സുരക്ഷ ഏര്‍പ്പെടുത്തിയിരുന്നു.
Discussion about this post