അനിയത്തിയും ഗായികയുമായ അഭിരാമി സുരേഷിനു ജന്മദിനാശംസകളുമായി ഗായിക അമൃത സുരേഷ്.
തന്റെ ആദ്യത്തെ മകളാണ് അഭിരാമിയെന്നും എല്ലായ്പ്പോഴും ഒരു ആൽമരം പോലെ തനിക്കൊപ്പം തണലായി നിൽക്കുന്നയാളാണെന്നും അമൃത കുറിച്ചു. ജീവിതത്തിൽ ആദ്യമായി അനിയത്തിയെ കണ്ടതു മുതലുള്ള ചെറിയ ചെറിയ കാര്യങ്ങൾ പോലും ഗായിക ഓർമ്മിച്ചെടുത്തു.
അമൃത സമൂഹമാധ്യമങ്ങളിൽ പങ്കുവച്ച കുറിപ്പ് ഇപ്പോൾ അവരുടെ ആരാധകർ ഏറ്റെടുത്തിരിക്കുകയാണ്. ‘വർഷങ്ങൾക്കു മുമ്പ് ഈ ദിവസം, എന്റെ ആദ്യ മകളായി, കുഞ്ഞാവയായി അവൾ എന്റെ ജീവിതത്തിലേക്കു കടന്നുവന്നു. അവൾ എനിക്ക് എന്തൊക്കെയാണെന്നു വിവരിക്കാൻ വാക്കുകൾ മതിയാകാതെ വരും. കുട്ടികളായിരുന്നപ്പോഴുള്ള ഞങ്ങളുടെ കളികളും സ്കൂൾ കാലവുമെല്ലാം ഓർത്തുപോവുകയാണിപ്പോൾ. എല്ലായ്പ്പോഴും കുറ്റങ്ങൾ സ്വയം ഏറ്റെടുത്ത് അവൾ എന്നെ രക്ഷിച്ചുകൊണ്ടേയിരുന്നു. എപ്പോഴും എനിക്കായി തണൽ വിരിച്ച് വലിയൊരു ആൽമരം പോല് അവൾ നിന്നു. അവളില്ലായിരുന്നെങ്കിൽ ഞാൻ എന്തു ചെയ്തേനെയെന്ന് എനിക്ക് യാതൊരു ധാരണയുമില്ല. അന്നത്തെ എന്റെ അഭിക്കുട്ടി മുതൽ ഇന്നെനിക്ക് അറിയാവുന്ന സുന്ദരിയും കരുണയും സഹാനുഭൂതിയുമുള്ള ഈ സ്ത്രീയായി വരെ നീ മാറിയിരിക്കുന്നു. പക്ഷേ എന്നും നീ എനിക്കെന്റെ കുഞ്ഞുവാവയാണ്. നിന്റെ മനസ്സും ശരീരവും ഒരുപോലെ സുന്ദരമാണ്. ദിനംപ്രതി നീ സുന്ദരിയായി മാറിക്കൊണ്ടേയിരിക്കുന്നു. നിന്നെ കിട്ടിയെന്നതാണ് എന്റെ ജീവിതത്തിൽ സംഭവിച്ച ഏറ്റവും മനോഹരമായ കാര്യം. എപ്പോഴും ഇതുപോലെ തന്നെ തുടരുക. ഒരിക്കലും പിന്നിലേക്കു പോകരുത്. പുഞ്ചിരിച്ചുകൊണ്ട് മുന്നോട്ടുതന്നെ നീങ്ങണം. ഞാൻ നിന്നെ ഒരുപാടൊരുപാട് ഇഷ്ടപ്പെടുന്നു അഭി. എന്റെ ജീവിതത്തിലെ ശൂന്യമായ എല്ലാ ഇടങ്ങളും നീ നിറയ്ക്കുന്നു. എനിക്ക് ജീവിക്കാൻ നീ മാത്രം മതി അഭിക്കുട്ടാ. ജന്മദിനാശംസകൾ’, അമൃത സുരേഷ് കുറിച്ചു.
അമൃതയുടെ ആശംസകൾക്ക് പിന്നാലെ മറുപടിയുമായി അഭിരാമി എത്തി. ഇത് വായിച്ചിട്ട് തനിക്ക് കരച്ചിലടക്കാൻ കഴിയുന്നില്ലെന്ന് മാത്രമല്ല ഒരാൾക്ക് കിട്ടാവുന്നതിലും വച്ച് ഏറ്റവും നല്ല ചേച്ചിയാണ് അമൃതയെന്നുമായിരുന്നു അഭിരാമിയുടെ വാക്കുകൾ. തുടർന്ന് നിരവധി പേരാണ് അഭിരാമിക്ക് പിറന്നാൾ ആശംസകളുമായി എത്തിയത്.
Discussion about this post