ന്യൂഡല്ഹി : ഒറ്റത്തവണ കേള്ക്കാന് കഴിയുന്ന ഓഡിയോ സന്ദേശങ്ങളുമായി വാട്സ്ആപ്പ്. ഉപയോക്താക്കളുടെ സ്വകാര്യതയ്ക്ക് പ്രാധാന്യം നല്കിയാണ് ഒറ്റത്തവണ കേള്ക്കാന് കഴിയുന്ന വോയിസ് സന്ദേശ ഫീച്ചര് അവതരിപ്പിക്കുന്നതെന്ന് വാട്സ്ആപ്പ് വ്യക്തമാക്കുന്നു. ഓഡിയോ വ്യൂ വണ്സ് എന്ന ഫീച്ചറാണ് പുതിയ അപ്ഡേഷനില് വന്നിട്ടുള്ളത്.
ഉപയോക്താക്കളുടെ അനുഭവം മെച്ചപ്പെടുത്തുന്നതിനായി നിരവധി പുതിയ ഫീച്ചറുകളാണ് വാട്സ്ആപ്പ് അവതരിപ്പിക്കുന്നത്. ദിവസങ്ങള്ക്ക് മുമ്പാണ് വാട്സ്ആപ്പിന്റെ പുതിയ ചാനല് ഫീച്ചര് പുറത്ത് വന്നത്. വന് സ്വീകാര്യതയാണ് ഇതിനോടകം ചാനലിന് ലഭിക്കുന്നത്. പ്രമുഖരെല്ലാം തന്നെ വാട്സ്ആപ്പ് ചാനല് ദിവസങ്ങള്ക്കകം തുടങ്ങി. ഇതിനിടയിലാണ് വോയിസ് നോട്ടില് സ്വകാര്യത കൊണ്ടു വരുന്നതിനായി പുതിയ ഫീച്ചര് അവതരിപ്പിക്കാന് വാട്സ്ആപ്പ് ഒരുങ്ങുന്നത്.
മെറ്റയുടെ ഉടമസ്ഥതയിലുള്ള ആപ്പ് പുതിയ അപ്ഡേറ്റുകള് ഇതിനകം തന്നെ പ്രഖ്യാപിച്ചിട്ടുണ്ട്. ഫോട്ടോകള്ക്കും വീഡിയോകള്ക്കുമായി വാട്ട്സ്ആപ്പിന്റെ നിലവിലുള്ള ‘വ്യൂ വണ്സ്’ ഫീച്ചറിന് സമാനമായിരിക്കും പുതിയ സംവിധാനം.
റിപ്പോര്ട്ട് അനുസരിച്ച്, വോയ്സ് നോട്ടുകള്ക്കായി ‘വ്യൂ വണ്സ്’ മോഡ് അവതരിപ്പിക്കുന്നത് ഉപയോക്താക്കള്ക്ക് സ്വകാര്യതയുടെ ഒരു അധിക അവസരം വാഗ്ദാനം ചെയ്യുന്നു. വോയ്സ് നോട്ടുകള് സേവ് ചെയ്യുന്നതില് നിന്നും ഫോര്വേഡ് ചെയ്യുന്നതില് നിന്നും ഈ ഫീച്ചര് തടയും. നിലവില്, ആപ്പിന്റെ ബീറ്റ പതിപ്പ് ഉപയോഗിക്കുന്ന പരിമിതമായ ആന്ഡ്രോയിഡ്, ഐഒഎസ് ഉപയോക്താക്കള്ക്ക് മാത്രമായി ഈ ഫീച്ചര് ആക്സസ് ചെയ്യാവുന്നതാണ്.
ഒരിക്കല് മോഡ് ആക്ടിവേറ്റ് ചെയ്താല് വോയ്സ് നോട്ട് ‘വ്യൂ വണ്സ്’ സഹിതം അയച്ചാല്, അയച്ചയാള്ക്കും സ്വീകര്ത്താവിനും ഒരുവട്ടം മാത്രമേ അത് കേള്ക്കാന് കഴിയുകയുള്ളൂ. അനധികൃത ആക്സസ് അല്ലെങ്കില് തുടര്ന്നുള്ള കൈമാറ്റങ്ങളെ കുറയ്ക്കുന്നതിന് ഈ ഫീച്ചര് സഹായിക്കും. സെന്സിറ്റീവും രഹസ്യാത്മകവുമായ വിവരങ്ങള് സംരക്ഷിക്കുന്നതിന് സ്വകാര്യതയുടെ ഒരു അധിക കവചമായി ഇത് മാറും.
Discussion about this post