ന്യൂഡൽഹി : മാലിദ്വീപിൽ ഉണ്ടായ സ്ഫോടനത്തിൽ രണ്ട് ഇന്ത്യക്കാർ മരണപ്പെട്ടതായി ഇന്ത്യൻ ഹൈ കമ്മീഷൻ അറിയിച്ചു. ഹാ ദാൽ മകുനുധൂ ദ്വീപിൽ ആണ് സ്ഫോടനം നടന്നത്. മാലിദ്വീപിൽ ജോലി ചെയ്യുന്ന ഇന്ത്യക്കാരായ തൊഴിലാളികളാണ് മരണപ്പെട്ടത്.
ദ്വീപിന്റെ തുറമുഖത്തിന്റെ തെക്കേ അറ്റത്ത് സ്ഥിതി ചെയ്യുന്ന മത്സ്യ മാർക്കറ്റിന് സമീപമാണ് സ്ഫോടനം ഉണ്ടായത്. ദ്വീപിൽ വിമാനത്താവളം നിർമിക്കുന്നതിനുള്ള ഭൂമി നികത്തൽ പദ്ധതിക്കായി കരാർ ജോലി ചെയ്തിരുന്ന തൊഴിലാളികളായിരുന്നു മരണപ്പെട്ടത്.
ദ്വീപിനെ മുഴുവൻ കുലുക്കിയ വലിയ സ്ഫോടനം ആയിരുന്നു നടന്നതെന്ന് റിപ്പോർട്ടുകൾ സൂചിപ്പിക്കുന്നു. സ്ഫോടനത്തിന്റെ കാരണം വ്യക്തമായിട്ടില്ല. ഗ്യാസ് സിലിണ്ടറിന്റെയും മറ്റും ഭാഗങ്ങൾ സ്ഫോടന സ്ഥലത്തു നിന്നും കണ്ടെത്തിയിട്ടുള്ളതായി പറയപ്പെടുന്നു. സംഭവത്തെക്കുറിച്ച് കൂടുതൽ അന്വേഷണങ്ങൾ നടന്നുവരികയാണ്.
