കൊൽക്കത്ത: ഐസിസി ലോകകപ്പ് ക്രിക്കറ്റ് മത്സരത്തിനിടെ പാലസ്തീൻ പതാക ഉയർത്തി പ്രതിഷേധം. സംഭവത്തിൽ നാലുപേർ അറസ്റ്റിലായി. ബംഗ്ലാദേശും പാകിസ്താനും തമ്മിലുള്ള മത്സരത്തിനിടെയാണ് ഈഡൻ ഗാർഡനിൽ സംഭവം നടന്നത്. പ്രാഥമിക ചോദ്യം ചെയ്യലിനുശേഷം നാലുപേരും മൈതാനം പിഎസ് വിട്ടു. അവർ ബാലി, എക്ബൽപൂർ, കാരയ പിഎസ് ഏരിയകളിൽ താമസിക്കുന്നവരാണെന്ന് മുതിർന്ന പോലീസ് ഉദ്യോഗസ്ഥൻ പറഞ്ഞു.
ഗേറ്റ് 6 നും ബ്ലോക്ക് ജി 1 നും സമീപമാണ് പലസ്തീൻ പതാക വീശിയത്. എന്താണ് നടക്കുന്നതെന്ന് ആദ്യമൊന്നും പോലീസിന് കൃത്യമായി മനസ്സിലായില്ല. കസ്റ്റഡിയിലെടുക്കാൻ ശ്രമിച്ചപ്പോൾ ഇവർ വീണ്ടും പാലസ്തീൻ പതാക വീശുകയായിരുന്നു. പ്രതിഷേധ മുദ്രാവാക്യങ്ങളൊന്നും ഇവർ വിളിച്ചില്ലെന്നും പോലീസ് പറഞ്ഞു.
ഇസ്രയേൽ-ഹമാസ് സംഘർഷത്തിൽ പ്രതിഷേധിക്കുകയായിരുന്നെന്നും തങ്ങളുടെ പ്രക്ഷോഭത്തിനായി അന്താരാഷ്ട്ര മത്സരവേദി തിരഞ്ഞെടുത്തുവെന്നും അറസ്റ്റിലായവർ പോലീസിന് മൊഴി നൽകിയിട്ടുണ്ട്.
