ന്യൂഡല്‍ഹി: ഇന്ത്യന്‍ സംഗീതോപകരണം സിത്താര്‍ പഠിക്കാന്‍ ശ്രമിച്ച സിംഗപ്പൂര്‍ ഉപപ്രധാനമന്ത്രിയെ പ്രശംസിച്ച് പ്രധാനമന്ത്രി നരേന്ദ്ര മോദി . ദീപാവലി ദിനത്തിലാണ് സിത്താര്‍ വായിക്കുന്ന വീഡിയോ സിംഗപ്പൂര്‍ ഉപപ്രധാനമന്ത്രി ലോറന്‍സ് വോങ് പങ്കുവെച്ചത്. നിങ്ങളുടെ ഈ ശ്രമം മറ്റുള്ളവര്‍ക്ക് പ്രചോദനം നല്‍കുകയും, ഈ ശ്രുതിമധുരമായ ശ്രമം കൂടുതല്‍ ആളുകളിലേക്ക് എത്തട്ടെയെന്നും പ്രധാനമന്ത്രി ആശംസിച്ചു.
സിത്താര്‍ പഠിപ്പിക്കാനെത്തിയ കാര്‍ത്തികേയന് ഒപ്പമുളള വീഡിയോയാണ് സിംഗപ്പൂര്‍ ഉപ പ്രധാനമന്ത്രി ലോറന്‍സ് വോങ് പങ്കുവെച്ചത്. ദീപാവലി ആശംസകള്‍ക്ക് ഒപ്പമാണ് കഴിഞ്ഞ ദിവസം വീഡിയോ പങ്കുവെച്ചത്. സമ്പന്നമായ ഇന്ത്യന്‍ ക്ലാസിക്കല്‍ സംഗീതത്തിന്റെ പാരമ്പര്യത്തെ കൂടുതല്‍ അറിയാനുളള അവസരമാണിതെന്നും വോങ് കുറിച്ചിരുന്നു. വീഡിയോയില്‍ തമിഴില്‍ ദീപാവലി ആശംസകളും നേരുന്നുണ്ട്.
ഇന്ത്യയുടെ സംഗീത ചരിത്രം നാനാത്വത്തിന്റെ സ്വരലയമാണെന്ന് പ്രധാനമന്ത്രി നരേന്ദ്രമോദി ചൂണ്ടിക്കാട്ടി. സിത്താര്‍ എങ്ങനെയാണ് വെയ്ക്കേണ്ടതെന്നും എങ്ങനെയാണ് അതില്‍ നാദമുണ്ടാക്കുന്നതെന്നും കാര്‍ത്തിക് വീഡിയോയില്‍ വിശദീകരിച്ച് നല്‍കുന്നുണ്ട്. ഗിറ്റാറിനോട് താല്‍പര്യമുളള വോങ് ഇടയ്ക്കിടെ ഇതിന്റെ വീഡിയോകള്‍ പോസ്റ്റ് ചെയ്യാറുണ്ട്.
ഉത്തരേന്ത്യയില്‍ ഏറ്റവും പ്രചാരമേറിയ സംഗീതോപകരണമാണ് സിത്താര്‍. 700 ഓളം വര്‍ഷത്തെ പാരമ്പര്യം ഇതിനുണ്ട്. കഴുത്തും 20 ലോഹനിര്‍മ്മിത ഫ്രെറ്റുകളും ആറോ ഏഴോ മുഖ്യതന്ത്രികളും ഇതിനുണ്ട്. രാഗത്തിന്റെ സ്വരസ്ഥാനങ്ങള്‍ക്കനുസരിച്ച് ഇവ ചിട്ടപ്പെടുത്തി വെച്ചിരിയ്ക്കും. ഫ്രെറ്റുകള്‍ക്കിടയിലൂടെ മീട്ടുമ്പോഴാണ് ശ്രുതിവ്യത്യാസം സംഭവിയ്ക്കുന്നത്.
Discussion about this post