നാഗ്പൂര് : രാജ്യത്ത് അഞ്ച് സംസ്ഥാനങ്ങളിലേക്കുള്ള നിയമസഭാ തിരഞ്ഞെടുപ്പ് അടുക്കുമ്പോള് ശക്തമായ പ്രചരണ പരിപാടികളുമായി മുന്നോട്ട് പോകുകയാണ് ബിജെപി. പാര്ട്ടി പൂര്ണ്ണ ആത്മ വിശ്വാസത്തിലാണെന്നും, കുറഞ്ഞത് അഞ്ചില് മുന്ന് എണ്ണമെങ്കിലും വിജയിക്കുമെന്ന് കേന്ദ്ര ഗതാഗത വകുപ്പ് മന്ത്രി നിതിന് ഗഡ്കരി പറഞ്ഞു.
മിസോറമിലും തെലങ്കാനയിലും തങ്ങളുടെ വിജയ ശതമാനം കൂടുമെന്നും അദ്ദേഹം കൂട്ടിച്ചേര്ത്തു. “മധ്യപ്രദേശില് ശിവരാജ് സിംഗ് ചൗഹാന്റെയും നരേന്ദ്ര മോദിയുടേയും നേതൃത്വത്തില് കഴിഞ്ഞ 20 വര്ഷമായി മികച്ച ഭരണമാണ് കാഴ്ച വയ്ക്കുന്നത്. അതിനാല് ഇവിടെ ഞങ്ങള്ക്ക് വിജയം സുനിശ്ചിതമാണ്”, നിതിന് ഗഡ്കരി പറഞ്ഞു.
കോണ്ഗ്രസിന്റെ ശക്തി ക്ഷയിച്ചു കഴിഞ്ഞു. രാഹുല് ഗാന്ധി എത്ര മോശം കാര്യങ്ങള് പറഞ്ഞാലും ജനങ്ങള് രാജ്യത്തെ നല്ല മാറ്റങ്ങള് കാണുകയും അറിയുകയും ചെയ്യുന്നുണ്ടെന്നും അതിനാല് ബിജെപി വിജയിക്കുമെന്ന് തന്നെയാണ് തന്റെ വിശ്വാസമെന്നും അദ്ദേഹം അഭിപ്രായപ്പെട്ടു.
“ലോക്സഭാ തിരഞ്ഞെടുപ്പില് ബിജെപി ഉറപ്പായും വിജയിക്കും. നരേന്ദ്ര മോദിയുടെ നേതൃത്വത്തില് വന് വികസന കുതിപ്പാണ് കഴിഞ്ഞ പത്ത് വര്ഷമായി ഇന്ത്യ കാഴ്ച വയ്ക്കുന്നത്. ഞങ്ങള് നല്ല കാര്യങ്ങള് ചെയ്തു. ഇന്ത്യയുടെ ഭാവി സുരക്ഷിതമാക്കാന് കഴിയുന്ന ഏക പാര്ട്ടിയായി ജനങ്ങള് വിശ്വസിക്കുന്നത് ബിജെപിയെയാണ്. അതിനാല് അവര് ഞങ്ങളെ തന്നെ വീണ്ടും തിരഞ്ഞെടുക്കും”, അദ്ദേഹം വ്യക്തമാക്കി.
