വാഷിംഗ്ടൺ: ഇസ്രയേലിൽ പലസ്തീൻ ഭീകരർ ഒക്ടോബർ 7ന് നടത്തിയ ആക്രമണത്തെ തുടർന്ന് ശക്തമായ നടപടികളുമായി അമേരിക്ക. പലസ്തീനിയൻ ഇസ്ലാമിക് ജിഹാദ് നേതാവ് അക്രം അൽ അജൗറിയെ അമേരിക്കൻ സ്റ്റേറ്റ് ഡിപ്പാർറ്റ്മെന്റ് ആഗോള ഭീകരനായി പ്രഖ്യാപിച്ചു. ഉന്നത ഹമാസ് നേതാക്കൾക്കെതിരെ ഉപരോധവും വിലക്കും ഉൾപ്പെടെയുള്ള നടപടികൾക്കും അമേരിക്ക ശുപാർശ നൽകി.
ഹമാസിനും പലസ്തീനിയൻ ഇസ്ലാമിക് ജിഹാദിനും ഇറാൻ പിന്തുണ നൽകുന്നതായി അമേരിക്ക കണ്ടെത്തി. ഇറാനുമായി അടുത്ത ബന്ധം പുലർത്തുന്ന ഹമാസ് നേതാക്കൾക്കെതിരെയാണ് അമേരിക്ക നടപടികൾ ശക്തമാക്കിയത്.
പലസ്തീനിയൻ ഇസ്ലാമിക് ജിഹാദിന്റെ ഡെപ്യൂട്ടി സെക്രട്ടറി ജനറലാണ് അൽ അജൗറി. ഗാസയിലും സിറിയയിലും സുഡാനിലും ലബനനിലും യെമനിലും ഇയാൾ ഭീകര പരിശീലനങ്ങളും തീവ്രവാദ റിക്രൂട്ട്മെന്റുകളും സംഘടിപ്പിച്ചതായും അമേരിക്കൻ സ്റ്റേറ്റ് സെക്രട്ടറി ആന്റണി ബ്ലിങ്കൻ വ്യക്തമാക്കി.
കരിമ്പട്ടികയിൽ പെട്ട ആഗോള ഭീകരനായ ഹമാസ് നേതാവ് ഇസ്മയിൽ ഹനിയയുമായി അടുത്ത ബന്ധം പുലർത്തിയിരുന്ന ഹമാസ് സഹസ്ഥാപകനും ഉന്നത നേതാവുമായ മഹ്മൂദ് ഖാലിദ് സഹറിനെ അമേരിക്ക ഭീകരനായി പ്രഖ്യാപിച്ചു. ഇയാൾക്കെതിരെ ഉപരോധവും വിലക്കും നിലനിൽക്കും.
ജൂതന്മാർക്കെതിരെ പരസ്യ പ്രസ്താവനകൾ നടത്തുകയും ഇസ്രയേലിനെ നശിപ്പിക്കുമെന്ന് പരസ്യമായി പ്രഖ്യാപിക്കുകയും ഹമാസിന് വേണ്ടി ഔദ്യോഗിക അഭിമുഖങ്ങളിൽ ഉൾപ്പെടെ രംഗത്ത് വരികയും ചെയ്യുന്ന ഭീകരനാണ് സഹർ. ഹമാസിന് വേണ്ടി ഇറാനുമായി ഇടപാടുകൾ നടത്തുന്നത് ഇയാളാണെന്നും അമേരിക്ക വ്യക്തമാക്കുന്നു.
മറ്റൊരു ഹമാസ് ഭീകരനായ മുഹമ്മദ് ഇബ്രാഹിം മുഹമ്മദ് റാഷിദ് അൽ അതീലിക്കെതിരെയും ശക്തമായ നടപടികൾ ഉണ്ടാകുമെന്ന് അമേരിക്കൻ സ്റ്റേറ്റ് ഡിപാർട്ട്മെന്റും ട്രഷറി ഡിപ്പാർട്ട്മെന്റും അറിയിച്ചു.
ഇറാനിലെ പലസ്തീനിയൻ ഇസ്ലാമിക് ജിഹാദ് പ്രതിനിധിയായ നാസർ അബു ഷരീഫിനും ഇയാൾ പ്രതിനിധീകരിക്കുന്ന സംഘടനയായ മുഹ്ജാത് അൽഖുദ്സ് ഫൗണ്ടേഷനും അമേരിക്ക വിലക്ക് ഏർപ്പെടുത്തി. പലസ്തീനിയൻ ഇസ്ലാമിക് ജിഹാദ് ഭീകരരുടെ കുടുംബാംഗങ്ങൾക്കും ഭീകരപ്രവർത്തനത്തിന് പിടിയിലായവരുടെ കുടുംബങ്ങൾക്കും സംഘടന മുഖേന സാമ്പത്തിക സഹായം എത്തുന്നതായി അമേരിക്ക കണ്ടെത്തി. സംഘടനയുടെ സ്ഥാപകൻ ജമീൽ യൂസുഫ് അഹ്മദ് അലിയാനെതിരെയും നടപടിയുണ്ടാകും.
കൂടാതെ ലെബനൻ ആസ്ഥാനമായി പ്രവർത്തിക്കുന്ന വിദേശനാണയ വിനിമയ കമ്പനിയായ നബീൽ ചൗമാൻ ആൻഡ് കമ്പനിക്കെതിരെയും അമേരിക്ക ഉപരോധം ഏർപ്പെടുത്തി. ഈ സ്ഥാപനം മുഖേന ഇറാനിൽ നിന്നും ഗാസയിലെ ഭീകരരുടെ കൈകളിലേക്ക് പണം എത്തിയതായി കണ്ടെത്തിയതിനെ തുടർന്നാണ് നടപടി. കമ്പനിയുടെ സ്ഥാപകൻ നബീൽ ഖാലിദ് ഹലീൽ, മകൻ ഖാലിദ് ചൗമാൻ, ലെബനീസ് വ്യവസായി റെദ അലി ഖാമിസ് എന്നിവർക്കെതിരെയും നടപടി ഉണ്ടാകും.
