കോഴിക്കോട് : കേരളീയ വാദ്യോപകരണങ്ങളില്‍ ഏറ്റവും ഗാംഭീര്യമാര്‍ന്നതാണ് ചെണ്ട. പതിനെട്ടു വാദ്യങ്ങളും ചെണ്ടയ്ക്ക് താഴേ എന്നൊരു ചൊല്ലു തന്നെയുണ്ട്. ചെണ്ടയുടെയത്ര ഉയര്‍ന്ന ശബ്ദം പുറപ്പെടുവിക്കുന്ന വാദ്യങ്ങള്‍ ലോകത്തില്‍ തന്നെ അപൂര്‍വ്വം. കേരളത്തിന്റെ താള വാദ്യ കലകളില്‍ ചെണ്ടമേളങ്ങള്‍ക്ക് അതിപ്രധാനമായ സ്ഥാനമാണുള്ളത്. ചെണ്ട മേളം മലയാളികളുടെ മനസിനെ തന്നെ കീഴടക്കുന്ന മേളമാണ്. എന്നാല്‍ ആ മേളത്തില്‍ വ്യത്യസ്തത കൊണ്ടുവന്ന് ലോക റെക്കോര്‍ഡ് കരസ്ഥമാക്കിയിരിക്കുകയാണ് കോഴിക്കോട് സ്വദേശി വിഷ്ണു ഒടുമ്പ്ര.
36 കിലോമീറ്റര്‍ ദൂരം ചെണ്ടകൊട്ടി നടന്നാണ് വിഷ്ണു ബെസ്റ്റ് ഓഫ് ഇന്ത്യ വേള്‍ഡ് റെക്കോര്‍ഡ് വാങ്ങിയത്. അതും ഒന്‍പത് മണിക്കൂര്‍ 29 മിനിറ്റ് തുടര്‍ച്ചയായി നടന്ന് ചെണ്ട കൊട്ടിയതിന്. ചെണ്ടയില്‍ വ്യത്യസ്തത കൊണ്ടുവന്ന് മൂന്നാമത്തെ തവണയാണ് ബെസ്റ്റ് ഓഫ് ഇന്ത്യ ലോക റെക്കോര്‍ഡ് വിഷ്ണു സ്വന്തമാക്കുന്നത്.
വിഷ്ണു പഠിച്ച കോഴിക്കോട് തിരുവണ്ണൂരിലെ ഗവണ്‍മെന്റ് യു.പി സ്‌കൂളിന് മുന്നില്‍ വെച്ചാണ് ശിങ്കാരിമേളം നടന്ന് കൊട്ടി കയറി റെക്കോര്‍ഡ് ഇട്ടത്. രാവിലെ എട്ടു മണിയോടുകൂടിയാണ് ചെണ്ട കൊട്ടല്‍ ആരംഭിച്ചത്. വിഷ്ണു ഒടുമ്പ്രയുടെ റെക്കോഡ് നേട്ടം കാണുന്നതിന് രാവിലെ മുതല്‍ വൈകുന്നേരം വരെ നിരവധി പേരാണ് സ്‌കൂളില്‍ എത്തിച്ചേര്‍ന്നത്.
റെക്കോര്‍ഡ് പുരസ്‌കാര കമ്മറ്റി അംഗം ജോസഫ് ബെസ്റ്റ് ഓഫ് ഇന്ത്യ വേള്‍ഡ് റെക്കോര്‍ഡ് സര്‍ട്ടിഫിക്കറ്റ് ചടങ്ങില്‍ വെച്ച് വിഷ്ണു ഒടുമ്പ്രക്ക് കൈമാറി. പരിപാടി കോഴിക്കോട് ജില്ലാ പഞ്ചായത്ത് വൈസ് പ്രസിഡണ്ട് അഡ്വ. പി ഗവാസ് ഉദ്ഘാടനം ചെയ്തു. ഒളവണ്ണ ഗ്രാമപഞ്ചായത്ത് പ്രസിഡണ്ട് അഡ്വ. പി ശാരുതി അധ്യക്ഷത വഹിച്ചു. കോര്‍പ്പറേഷന്‍ വാര്‍ഡ് കൗണ്‍സിലര്‍ കെ.നിര്‍മ്മല, സ്‌കൂള്‍ ഹെഡ്മിസ്ട്രസ് ലാലി ജോസഫ്, പുരസ്‌കാര കമ്മറ്റി അംഗം പീറ്റര്‍ തുടങ്ങിയവര്‍ സംസാരിച്ചു.
മൂന്നുമാസത്തെ കഠിനപ്രയത്‌നത്തിന്റെ ഫലമാണ് ഇപ്പോള്‍ ലഭിച്ച റെക്കോഡ് നേട്ടമെന്ന് വിഷ്ണു ഒടുംമ്പ്ര പറഞ്ഞു. ഒടുമ്പ്ര തിരുത്തിത്താഴത്ത് ടി.ടി സ്വാമി പ്രസാദ് -എം. ദീപ ദമ്പതികളുടെ മകനാണ് വിഷ്ണു. വിനായക് സഹോദരനാണ്.
Discussion about this post