എറണാകുളം : കരുവന്നൂര് കള്ളപ്പണ ഇടപാട് കേസില് കുന്നംകുളം എംഎൽഎ എസി മൊയ്തീന്റെ ബിനാമിയായി പി സതീഷ് കുമാര് പ്രവര്ത്തിച്ചുവെന്ന് എന്ഫോഴ്സ്മെന്റ് ഡയറക്ടറേറ്റ് കോടതിയിൽ വെളിപ്പെടുത്തി. പി സതീഷ് കുമാറിന്റെ ജാമ്യാപേക്ഷയെ എതിർക്കുമ്പോൾ ആയിരുന്നു എറണാകുളം പ്രത്യേക പിഎംഎല്എ കോടതിയിൽ ഇ ഡിയുടെ ഈ വെളിപ്പെടുത്തൽ. ജാമ്യാപേക്ഷയില് കോടതി നാളെയും വാദം കേള്ക്കും.
സിപിഐഎം നേതാവ് എം കെ കണ്ണനെതിരെയും മുന് ഡിഐജി എസ് സുരേന്ദ്രന്, വ്യാപാരി വ്യവസായി സമിതി നേതാവ് ബിന്നി ഇമ്മട്ടി എന്നിവർക്കെതിരെയും കുറ്റക്കാരാണെന്ന് സൂചിപ്പിക്കുന്ന മൊഴികൾ ഉള്ളതായി ഇഡി വെളിപ്പെടുത്തി. 100ന് 10 രൂപ നിരക്കില് പി സതീഷ് കുമാര് പലിശ ഈടാക്കിയെന്നും ഇഡി കോടതിയെ അറിയിച്ചു.
മുന് ഡിഐജി എസ് സുരേന്ദ്രന് വസ്തു തര്ക്കത്തില് ഇടനിലക്കാരനായി പണം കൈപ്പറ്റിയെന്നും ഇഡി മൊഴി നൽകി.
പി സതീഷ് കുമാറിനോടൊപ്പം ജിൽസിനും കോടതിയിൽ ജാമ്യാപേക്ഷ നൽകിയിട്ടുണ്ട്. പി സതീഷ് കുമാറിന്റെ ജാമ്യാപേക്ഷയില് വാദം പൂര്ത്തിയായ ശേഷം ജില്സിന്റെ കേസ് കോടതി വാദം കേള്ക്കും.
കരുവന്നൂര് സാമ്പത്തിക തട്ടിപ്പ് കേസിലെ രേഖകള് വിട്ടുകിട്ടണമെന്ന് ആവശ്യപ്പെട്ട് ക്രൈംബ്രാഞ്ച് നല്കിയ അപേക്ഷയും എറണാകുളം പ്രത്യേക പിഎംഎല്എ കോടതി നാളെ പരിഗണിക്കും.
