ചക്രവാത ചുഴി; അഞ്ച് ദിവസം അതിശക്തമായ മഴയ്ക്ക് സാദ്ധ്യത; നാല് ജില്ലകളിൽ യെല്ലോ അലർട്ട്

തിരുവനന്തപുരം: ചക്രവാത ചുഴിയുടെ സ്വാധീനം ഇപ്പോഴും നിലനിൽക്കുന്നതിനാൽ സംസ്ഥാനത്ത് അഞ്ച് ദിവസം കൂടി മഴ തുടരുമെന്ന് കാലാവസ്ഥാ നിരീക്ഷണ കേന്ദ്രം. ഇന്ന് മുതൽ വെള്ളിയാഴ്ചവരെ കേരളത്തിൽ ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ മഴയ്ക്കും മണിക്കൂറിൽ 30 മുതൽ 40 കിലോമീറ്റർ വരെ വേഗതയിൽ വീശിയേക്കാവുന്ന ശക്തമായ കാറ്റിനും സാധ്യതയുണ്ടെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.

ശക്തമായ മഴയ്ക്കുള്ള സാദ്ധ്യത പരിഗണിച്ച് ഇന്ന് നാല് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. എറണാകുളം, ഇടുക്കി, പാലക്കാട്, മലപ്പുറം ജില്ലകളിലാണ് ഇന്ന് യെല്ലോ അലർട്ട്. വരും ദിവസങ്ങളിൽ മറ്റ് ജില്ലകളിലും മഴ ശക്തമാകുമെന്നാണ് റിപ്പോർട്ട്.

പത്തനംതിട്ട, ഇടുക്കി ജില്ലകളിൽ നാളെയും (22-11-2023) ഇടുക്കിയിൽ വ്യാഴാഴ്ചയും (23-11-2023) ഓറഞ്ച് അലർട്ടാണ്. തിരുവനന്തപുരം, മലപ്പുറം ജില്ലകളിൽ നാളെയും (22-11-2023) പത്തനംതിട്ട, എറണാകുളം, മലപ്പുറം ജില്ലകളിൽ വ്യാഴാഴ്ചയും (23-11-2023) പത്തനംതിട്ട, എറണാകുളം, ഇടുക്കി, മലപ്പുറം ജില്ലകളിൽ വെള്ളിയാഴ്ചയും (24-11-2023) യെല്ലോ അലർട്ട് നൽകിയിട്ടുണ്ട്.

മഴ സാധ്യത നിലനിൽക്കുന്ന സാഹചര്യത്തിൽ മലയോര മേഖലയിൽ താമസിക്കുന്നവരും താഴ്ന്ന പ്രദേശങ്ങളിൽ താമസിക്കുന്നവരും ജാഗ്രത പുലർത്തണമെന്ന് മുന്നറിയിപ്പുണ്ട്. രണ്ട് ചക്രവാത ചുഴികളാണ് നിലവിൽ കേരളത്തിൽ സ്വാധീനം ചെലുത്തുന്നത്.