കോട്ട : രാജസ്ഥാനിലെ കോണ്ഗ്രസ് സര്ക്കാരിനെതിരെ കടുത്ത വിമര്ശനവുമായി പ്രധാനമന്ത്രി നരേന്ദ്ര മോദി. കോണ്ഗ്രസ് അധികാരത്തില് തുടര്ന്നാല് സംസ്ഥാനത്ത് കൂടുതല് നാശ നഷ്ടങ്ങള് ഉണ്ടാകുമെന്ന് പ്രധാനമന്ത്രി പറഞ്ഞു. രാജസ്ഥാനിലെ കോട്ടയില് നടന്ന റാലിയെ അഭിസംബോധന ചെയ്യുകയായിരുന്നു അദ്ദേഹം.
“പൂര്ണ്ണ പോലീസ് സംരക്ഷണത്തിലാണ് പിഎഫ്ഐ റാലി നടക്കുന്നത്. ഇത്തരമൊരു കോണ്ഗ്രസ് സര്ക്കാര് എത്രത്തോളം അധികാരത്തില് തുടരുന്നുവോ അത്രത്തോളം അത് രാജസ്ഥാനില് കൂടുതല് നാശമുണ്ടാക്കും”, പ്രധാനമന്ത്രി അഭിപ്രായപ്പെട്ടു. ഭീകര പ്രവര്ത്തനങ്ങളുമായുള്ള ബന്ധത്തിന്റെയും ഐസിസ് പോലുള്ള ആഗോള ഭീകര സംഘടനകളുമായുള്ള ബന്ധത്തിന്റെയും അടിസ്ഥാനത്തില് പിഎഫ്ഐയെ കഴിഞ്ഞ വര്ഷം സെപ്റ്റംബറില് കേന്ദ്രം നിരോധിച്ചിരുന്നു.
അതേസമയം, പേപ്പര് ചോര്ച്ച വിഷയത്തില് കോണ്ഗ്രസ് സര്ക്കാരിനെ രൂക്ഷമായി വിമര്ശിച്ച പ്രധാനമന്ത്രി, പേപ്പര് ചോര്ച്ചയില് ഉള്പ്പെട്ടവരെ ജയിലില് അയക്കുമെന്നത് തന്റെ ഉറപ്പാണെന്നും ജനങ്ങള്ക്ക് വാക്ക് നല്കി. “രാജ്യത്തുടനീളമുള്ള വിദ്യാര്ത്ഥികള് വിദ്യാഭ്യാസ ആവശ്യങ്ങള്ക്കായി കോട്ടയിലെത്തുന്നു. കഴിഞ്ഞ അഞ്ച് വര്ഷമായി കോണ്ഗ്രസ് പാര്ട്ടി യുവാക്കളുടെ സ്വപ്നങ്ങള് ആവര്ത്തിച്ച് നശിപ്പിച്ചു. എല്ലാ പരീക്ഷകളുടെയും പേപ്പറുകള് കോണ്ഗ്രസ് വിറ്റു. പേപ്പര് ചോര്ച്ചയില് ഉള്പ്പെട്ടയാളെ ജയിലിലേക്ക് അയക്കുമെന്ന് ഞാന് നിങ്ങള്ക്ക് ഉറപ്പുനല്കുന്നു. ഇത് പ്രധാനമന്ത്രി മോദിയുടെ ഉറപ്പാണ്”, മോദി കൂട്ടിച്ചേര്ത്തു.
രാജസ്ഥാനിലെ കോണ്ഗ്രസ് സര്ക്കാരിന്റെ കൗണ്ട്ഡൗണ് ആരംഭിച്ചതായും അദ്ദേഹം പറഞ്ഞു. “രാജസ്ഥാനിലെ കോണ്ഗ്രസ് സര്ക്കാരിനെതിരെ ഇത്രയും രൂക്ഷമായ രോഷം ഞാന് മുമ്പ് കണ്ടിട്ടില്ല. രാജസ്ഥാനിലെ യുവാക്കള് കോണ്ഗ്രസില് നിന്ന് സ്വാതന്ത്ര്യം ആഗ്രഹിക്കുന്നു. രാജസ്ഥാനിലെ സ്ത്രീകള്, കര്ഷകര്, വ്യാപാരികള്, വ്യവസായികള്, കടയുടമകള് എന്നിവര്ക്കെല്ലാം കോണ്ഗ്രസില് നിന്ന് സ്വാതന്ത്ര്യം വേണം. കോണ്ഗ്രസ് മുക്ത ഭാരതം സൃഷ്ടിക്കുന്നതിന്റെ നേതൃത്വം ഈ ജനങ്ങളാണ് ഏറ്റെടുക്കുക”, അദ്ദേഹം വ്യക്തമാക്കി.
Discussion about this post