ആരോരുമില്ലാത്ത കുഞ്ഞുങ്ങളുടെ ചെറുപുഞ്ചിരിക്ക് കാരണമാകാം; ചിൽഡ്രസ് ഹോമുകളിലേക്ക് ക്രിസ്തുമസ് സമ്മാനങ്ങൾ അയക്കാം; ചെയ്യേണ്ടത് ഇത്ര മാത്രം

തിരുവനന്തപുരം: ഈ വർഷത്തെ ക്രിസ്തുമസ് ദിനത്തിൽ ആരോരുമില്ലാത്ത ഒരു കുഞ്ഞിന്റെ ചെറുപുഞ്ചിരിക്ക് കാരണമാകാൻ ഒരു അവസരം. തിരുവനന്തപുരം ജില്ലയിലെ സർക്കാർ ചിൽഡ്രൻസ് ഹോമുകളിലെ കുട്ടികൾക്ക് ക്രിസ്തുമസ് സമ്മാനങ്ങൾ നൽകുന്ന ബീ എ സാന്റാ പദ്ധതി ഇത്തവണയും നടപ്പാക്കുമെന്ന് കളക്ടർ ജെറാമിക്ക് ജോർജ് വ്യക്തമാക്കി. പദ്ധതിയുടെ ഭാഗമാകാൻ താൽപര്യമുള്ളവർക്ക് കുട്ടികൾ തന്നെ ആഗ്രഹം പറഞ്ഞ സമ്മാനങ്ങൾ വാങ്ങി, തിരുവനന്തപുരം കളക്ടറേറ്റിന്റെ അഡ്രസിൽ അയ്ക്കാമെന്ന് കളക്ടർ അറിയിച്ചു. സമ്മാനങ്ങൾ ഡിസംബർ 25ന് കുട്ടികൾക്ക് കൈമാറുന്നതാണ് രീതി.

ജില്ലയിലെ വിവിധ ഗവൺമെന്റ് ചിൽഡ്രൻസ് ഹോമിലെ കുട്ടികൾക്ക് ക്രിസ്തുമസ് സമ്മാനങ്ങൾ നൽകുവാൻ തിരുവനന്തപുരം ജില്ലാ ഭരണകൂടം നടപ്പിലാക്കുന്ന ബഹുജന സഹകരണ പ്രവർത്തനമാണ് ബീ എ സാന്റാ. കഴിഞ്ഞ വർഷം ശ്രീ ചിത്രാ പുവർ ഹോം കേന്ദ്രീകരിച്ച് സംഘടിപ്പിച്ച പരിപാടിയിൽ കുട്ടികൾ ആഗ്രഹം പ്രകടിപ്പിച്ച നൂറോളം സമ്മാനങ്ങൾ പബ്ലിക് വിഷ്‌ലിസ്റ്റ് ആയി ഇടുകയും, കേരളത്തിനകത്തും പുറത്തും നിന്നുമായി സുമനസ്സുകൾ ഈ സമ്മാനങ്ങൾ വാങ്ങി അയയ്ക്കുകയും ചെയ്തു. ഈ വിജയകരമായ നിർവഹണത്തെതുടർന്ന് ഈ ക്രിസ്മസ് കാലവും പുഞ്ചിരികൾ നിറക്കുവാനായി ബീ എ സാന്റാ രണ്ടാം ഘട്ട പദ്ധതി ആവിഷ്‌കരിക്കുകയാണ്.
ഈ പ്രവർത്തനത്തിന്റെ ഭാഗമായി, നിങ്ങൾക്ക് പോസ്റ്റിനൊപ്പം നൽകുന്ന Amazon Wishlist-ൽ നിന്ന് കുട്ടികൾ തന്നെ ആഗ്രഹം പറഞ്ഞ സമ്മാനങ്ങൾ വാങ്ങി, നൽകിയിരിക്കുന്ന തിരുവനന്തപുരം കളക്ടറേറ്റിന്റെ അഡ്രസ്സിലേക്ക് അയക്കാവുന്നതാണ്.
ഈ സമ്മാനങ്ങൾ ഡിസംബർ 25ന് ചിൽഡ്രൻസ് ഹോമിലെ കുട്ടികൾക്ക് ജില്ലാ കളക്ടർ കൈമാറുന്നു.
നമുക്കെല്ലാവർക്കും കൈകോർത്ത് ബീ എ സാന്റാ ഒരു വലിയ വിജയമാക്കി മാറ്റം…നിങ്ങൾക്ക് ഒരു കുട്ടിയുടെ പുഞ്ചിരിയുടെ കാരണമാകാം…ഈ ക്രിസ്തുമസിന്റെ യഥാർത്ഥ മധുരം ആസ്വദിക്കാം..
വിഷ്‌ലിസ്റ്റ് ലിങ്ക് – https://www.amazon.in/hz/wishlist/ls/20O6UJFIA3O1R…
സമ്മാനങ്ങൾ അയക്കേണ്ട വിലാസം –
Geromic George IAS
District Collector, Collectorate, 2nd floor civil station building, civil station road, Kudappanakkunnu, Thiruvananthapuram, Kerala. PIN – 695043