ദഹ്റാൻ: ലോകത്തിലെ ഏറ്റവും വലിയ എണ്ണ ഉൽപ്പാദക കമ്പനിയായ സൗദി അരാംകോയുടെ കോർപ്പറേറ്റ് ആസ്ഥാനത്തിന് നേരെ യമനിലെ ഹൂതി വിമതരുടെ മിസൈൽ ആക്രമണം. കിഴക്കൻ പ്രവിശ്യയായ ദഹ്റാനിലുള്ള അരാംകോയുടെ പ്രധാന അഡ്മിനിസ്ട്രേറ്റീവ് സമുച്ചയത്തിന് നേരെയാണ് ചൊവ്വാഴ്ച രാത്രിയോടെ ആക്രമണമുണ്ടായത്. ആക്രമണത്തെ തുടർന്ന് കെട്ടിടത്തിൽ വൻ തീപിടിത്തമുണ്ടായതായും പ്രദേശത്ത് ശക്തമായ സ്ഫോടന ശബ്ദങ്ങൾ മുഴങ്ങിയതായും റിപ്പോർട്ടുകൾ വ്യക്തമാക്കുന്നു.
സ്ഫോടനമുണ്ടായതിന് തൊട്ടുപിന്നാലെ അരാംകോ ആസ്ഥാനത്തെ സുരക്ഷാ വിഭാഗവും പ്രതിരോധ സേനയും ഉടനടി ഇടപെടുകയും കെട്ടിടത്തിൽ ഉണ്ടായിരുന്ന മുഴുവൻ ജീവനക്കാരെയും സുരക്ഷിത സ്ഥാനങ്ങളിലേക്ക് അടിയന്തരമായി ഒഴിപ്പിക്കുകയും ചെയ്തു. പ്രതിരോധ സംവിധാനങ്ങൾ ഉപയോഗിച്ച് ഹൂതി ആക്രമണത്തെ നേരിട്ടെങ്കിലും, അവശിഷ്ടങ്ങൾ പതിച്ചാണ് കെട്ടിടത്തിന്റെ ഒരു ഭാഗത്ത് തീപിടിത്തമുണ്ടായതെന്നാണ് പ്രാഥമിക നിഗമനം. എമർജൻസി റെസ്പോൺസ് ടീമുകൾ ഉടൻ തന്നെ സ്ഥലത്തെത്തി തീയണയ്ക്കാനുള്ള നടപടികൾ പൂർത്തിയാക്കി.
ആക്രമണത്തിന്റെ വ്യാപ്തി കണക്കിലെടുത്ത് സുരക്ഷ ശക്തമാക്കിയതോടെ മേഖലയിൽ കനത്ത ജാഗ്രതാ നിർദ്ദേശം നൽകിയിട്ടുണ്ട്. സംഭവത്തിൽ ആർക്കെങ്കിലും ജീവഹാനിയോ പരിക്കോ സംഭവിച്ചിട്ടുണ്ടോ എന്നത് സംബന്ധിച്ച് ഔദ്യോഗിക വിവരങ്ങൾ പുറത്തുവന്നിട്ടില്ല. ആക്രമണത്തെ തുടർന്ന് എണ്ണ ഉൽപ്പാദനത്തെയോ വിതരണത്തെയോ ബാധിച്ചിട്ടുണ്ടോ എന്ന് കമ്പനി അധികൃതർ നിരീക്ഷിച്ചു വരികയാണ്. മിഡിൽ ഈസ്റ്റിലെ സംഘർഷാവസ്ഥ കൂടുതൽ കടുക്കുന്നതിനിടെ സൗദിയുടെ എണ്ണ അടിത്തറ ലക്ഷ്യമിട്ട് ഹൂതികൾ നടത്തുന്ന തുടർച്ചയായ നീക്കങ്ങൾ അന്താരാഷ്ട്ര എണ്ണവിപണിയിലും വലിയ ആശങ്കയ്ക്ക് വഴിവെച്ചിട്ടുണ്ട്.
