ഫില്വാരാ : രാജേഷ് പൈലറ്റ് മരിച്ചിട്ടും കോണ്ഗ്രസ് പാര്ട്ടി മകന് സച്ചിന് പൈലറ്റിനെ ഇന്നും ശിക്ഷിക്കുകയാണെന്ന് പ്രധാനമന്ത്രി നരേന്ദ്ര മോദി. രാജേഷ് പൈലറ്റ് ഒരിക്കല് മാത്രമാണ് കോണ്ഗ്രസിനെതിരെ ശബ്ദമുയര്ത്തിയതെന്നും അതും കോണ്ഗ്രസിന്റെ പുരോഗതിക്ക് വേണ്ടിയാണെന്നും എന്നാല് അതിന്റെ പേരില് പാര്ട്ടി സച്ചിന് പൈലറ്റിനെ ഇന്നുവരെയും ശിക്ഷിക്കുകയാണെന്നും പ്രധാനമന്ത്രി പറഞ്ഞു. രാജസ്ഥാനിലെ ഫില്വാരയില് നടന്ന റാലിയെ അഭിസംബോധന ചെയ്യുകയായിരുന്നു അദ്ദേഹം.
“സച്ചിന് പൈലറ്റിനെതിരെ കടുത്ത വിദ്വേഷമാണ് കോണ്ഗ്രസ് പ്രകടിപ്പിക്കുന്നത്. നിങ്ങള്ക്ക് കോണ്ഗ്രസിന്റെ ചരിത്രം അറിയാം. പാര്ട്ടിയിലെ തെറ്റുകള്ക്കെതിരെ ശബ്ദമുയര്ത്താന് ശ്രമിക്കുന്നവര്ക്ക് ഡല്ഹിയിലെ ഹൈക്കമാന്ഡ് കാരണം രാഷ്ട്രീയത്തില് പദവികള് നഷ്ടപ്പെടും. രാജേഷ് പൈലറ്റ് ഒരിക്കല് മാത്രം കോണ്ഗ്രസിനെതിരെ ശബ്ദമുയര്ത്തി, അതും കോണ്ഗ്രസിന്റെ ഉന്നമനത്തിനായി. പക്ഷേ അതിന്റെ പേരില് പാര്ട്ടി സച്ചിന് പൈലറ്റിനെ ഇന്നും ശിക്ഷിക്കുന്നു. രാജേഷ് പൈലറ്റ് ഇപ്പോഴില്ല, പക്ഷേ കോണ്ഗ്രസ് അദ്ദേഹത്തിന്റെ മകന് സച്ചിന് പൈലറ്റിനോട് വിരോധമാണ് പ്രകടിപ്പിക്കുന്നത്”, പ്രധാനമന്ത്രി പറഞ്ഞു.
നേരത്തെ പാര്ട്ടിയിലെ പ്രമുഖ നേതാക്കളില് ഒരാളായ അന്തരിച്ച രാജേഷ് പൈലറ്റ് സോണിയാ ഗാന്ധിയെ പ്രധാനമന്ത്രിയായി മത്സരിപ്പിക്കുന്നതിനെ ശക്തമായി എതിര്ത്തിരുന്നു. അതിന്റെ പേരില് കോണ്ഗ്രസ് പാര്ട്ടി അദ്ദേഹത്തോട് കടുത്ത എതിര്പ്പ് വച്ച പുലര്ത്തിയിരുന്നു. 2000ലാണ് രാജേഷ് പൈലറ്റ് അന്തരിച്ചത്. പിന്നാലെ 2004ല് രാഷ്ട്രീയത്തില് വന്ന സച്ചിന് പൈലറ്റ് രാഹുല് ഗാന്ധിയുടെ അടുത്ത ആളായി പ്രവര്ത്തിച്ചിരുന്നു.
2018-ലെ രാജസ്ഥാനിലെ കോണ്ഗ്രസിന്റെ വിജയത്തിന് തൊട്ടുപിന്നാലെയാണ് സച്ചിന് പൈലറ്റും അശോക ഗെഹ്ലോട്ടും തമ്മിലുള്ള ഭിന്നത ഉയര്ന്നത്. മുഖ്യമന്ത്രി സ്ഥാനത്തിന് വേണ്ടി ഇരുവരും തമ്മില് ആഭ്യന്തര പ്രശനം ഉടലെടുക്കുകയായിരുന്നു. എന്നാല് രാജേഷ് പൈലറ്റിനോടുള്ള കോണ്ഗ്രസിന്റെ വിരോധത്തിന്റെ പേരിലാണ് സച്ചിന് മുഖ്യമന്ത്രി പദം നിഷേധിക്കപ്പെടുന്നതെന്നാണ് ആക്ഷേപം.
Discussion about this post