കൊല്ക്കത്ത : പൗരത്വ ഭേദഗതി നിയമം നടപ്പാക്കുന്നത് തടയാന് ആര്ക്കും കഴിയില്ലെന്നും 2026 ലെ നിയമസഭാ തിരഞ്ഞെടുപ്പില് പശ്ചിമ ബംഗാളില് ബിജെപി സര്ക്കാര് രൂപീകരിക്കാനുള്ള അടിത്തറ പാകാന് 2024ല് നരേന്ദ്ര മോദിയെ ജനങ്ങള് പ്രധാനമന്ത്രിയായി വീണ്ടും തിരഞ്ഞെടുക്കുമെന്നും കേന്ദ്ര ആഭ്യന്തരമന്ത്രി അമിത് ഷാ. രാജ്യത്തേക്ക് അനധികൃതമായി നുഴഞ്ഞു കയറുന്നവരെ പിന്തുണയ്ക്കുന്നതിനാലാണ് മമത ബാനര്ജി സിഎഎ എതിര്ക്കുന്നതെന്നും അമിത് ഷാ പറഞ്ഞു. കൊല്ക്കത്തയില് വച്ച് നടന്ന റാലിയെ അഭിസംബോധന ചെയ്യുകയായിരുന്നു അദ്ദേഹം.
പ്രീണനം, നുഴഞ്ഞുകയറ്റം, അഴിമതി, രാഷ്ട്രീയ അക്രമം തുടങ്ങിയ വിഷയങ്ങളില് മുഖ്യമന്ത്രി മമത ബാനര്ജിയൈ കേന്ദ്ര ആഭ്യന്തര മന്ത്രി രൂക്ഷമായി വിമര്ശിച്ചു.
നുഴഞ്ഞുകയറ്റത്തെ പിന്തുണയ്ക്കുന്നതിനാലാണ് മമത് ബാനര്ജി സിഎഎ യെ എതിര്ക്കുന്നത്. ഇത്രയധികം നുഴഞ്ഞു കയറ്റക്കാരുള്ള ഒരു സംസ്ഥാനത്ത് വികസനം സാധ്യമാകില്ലെന്നും അദ്ദേഹം കൂട്ടിച്ചേര്ത്തു.
2026 ലെ അടുത്ത നിയമസഭാ തെരഞ്ഞെടുപ്പില് ബിജെപിയെ തിരഞ്ഞെടുത്ത് മമതാ സര്ക്കാരിനെ പുറത്താക്കാന് ലോക്സഭാ തിരഞ്ഞെടുപ്പില് പ്രധാനാമന്ത്രി മോദിയെ പിന്തുണച്ച് ബിജെപിക്ക് ശക്തമായ അടിത്തറ പാകാന് അമിത് ഷാ ജനങ്ങളോട് ആവശ്യപ്പെട്ടു.
“മമതാ ബാനര്ജിയുടെ നേതൃത്വത്തിലുള്ള തൃണമൂല് കോണ്ഗ്രസ് കഴിഞ്ഞ നിയമസഭാ തെരഞ്ഞെടുപ്പില് കൃത്രിമം നടത്തിവിജയിച്ചെങ്കിലും ബിജെപി പൂജ്യത്തില് നിന്ന് 77 സീറ്റുകളിലേക്ക് ഉയര്ന്നു. അഴിമതി, നുഴഞ്ഞുകയറ്റം, രാഷ്ട്രീയ അക്രമം എന്നിവയിലൂടെ സംസ്ഥാനത്തേ പിറകിലേക്ക് നയിക്കുയാണ് തൃണമൂല് കോണ്ഗ്രസ്. പ്രധാനമന്ത്രിയുടെ വികസന അജണ്ടകള് നടപ്പാക്കാന് നല്കുന്ന വലിയ തുകകള് തൃണമൂല് കോണ്ഗ്രസ് നടത്തുന്ന സിന്ഡിക്കേറ്റ് മോഷ്ടിക്കുകയാണ്. സംസ്ഥാനത്തെ പാവപ്പെട്ട ജനങ്ങളിലേയ്ക്ക് യാതൊരു ആനുകൂല്യവും എത്തുന്നില്ല”, അമിത് ഷാ ആരോപിച്ചു.
ബാനര്ജി അംഗമായിരുന്ന കോണ്ഗ്രസിന്റെ നേതൃത്വത്തിലുള്ള യുപിഎയെക്കാള് ബിജെപിയുടെ കീഴില് വിവിധ പദ്ധതികളിലൂടെ സംസ്ഥാനത്തിനുള്ള കേന്ദ്രത്തിന്റെ ധനസഹായം നിരവധി മടങ്ങ് വര്ദ്ധിച്ചു. ബിജെപിയുടെ റാലികളിലെ ജനപങ്കാളിത്തം ബംഗാളിലെ നിലവിലെ അവസ്ഥയില് ജനങ്ങള് തൃപ്തരല്ലെന്നതിന്റെ തെളിവാണ്. മമതാ ബാനര്ജി സിഎഎ എതിര്ക്കുന്നത് വോട്ട് ബാങ്ക് രാഷ്ട്രീയത്താല്. എന്നാല് അത് രാജ്യത്തിന്റെ നിയമമാണ്. അത് നടപ്പാക്കുന്നത് തടയാന് ആര്ക്കും കഴിയില്ലെന്നും അദ്ദേഹം വ്യക്തമാക്കി.
Discussion about this post