ന്യൂഡൽഹി: ലഡാക്കിലും ബംഗ്ലാദേശിലും ഭൂചലനം. റിക്ടർ സ്കെയിലിൽ 3.4 തീവ്രത രേഖപ്പെടുത്തിയ ഭൂചലനമാണ് ലഡാക്കിൽ ഉണ്ടായത്. രാവിലെ 8.25 ഓടെയായിരുന്നു ഭൂചലനമെന്ന് നാഷണൽ സെന്റർ ഫോർ സീസ്മോളജി അറിയിച്ചു. പത്ത് കിലോമീറ്റർ ആഴത്തിലായിരുന്നു ഭൂചലനം ഉണ്ടായത്.
ബംഗ്കാദേശിൽ ഉണ്ടായ ഭൂചലനം റിക്ടർ സ്കെയിലിൽ 5.8 തീവ്രതയാണ് രേഖപ്പെടുത്തിയത്. പത്ത് കിലോമീറ്റർ ആഴത്തിലായിരുന്നു പ്രഭവ കേന്ദ്രം. രണ്ട് ഭൂചലനങ്ങളിലും ആളപായമുണ്ടായതായി റിപ്പോർട്ടില്ല.
ഭൂകമ്പങ്ങൾക്ക് സാദ്ധ്യത കൂടുതലുള്ള സീസ്മിക് സോൺ നാലിലാണ് ലേയും ലഡാക്കും സ്ഥിതി ചെയ്യുന്നത്. ടെക്ടോണിക് ചലനങ്ങൾ സജീവമായ ഹിമാലയൻ മേഖലയിൽ സ്ഥിതി ചെയ്യുന്നതിനാലാണ് ഇവിടെ ഇടയ്ക്കിടെ ഭൂചലനങ്ങൾ ഉണ്ടാകുന്നത്.
മുൻകാല ചരിത്രം, ഭൗമശാസ്ത്ര സവിശേഷതകൾ, ടെക്ടോണിക് അളവുകൾ എന്നിവയുടെ അടിസ്ഥാനത്തിൽ ഇന്ത്യയെ രണ്ട് മുതൽ അഞ്ച് വരെ സീസ്മിക് മേഖലകളായി തിരിച്ചിരിക്കുന്നു. ഇവയിൽ സീസ്മിക് മേഖല അഞ്ചാണ് ഏറ്റവും അപകടകരം. സീസ്മിക് മേഖല രണ്ടാണ് ഏറ്റവും സുരക്ഷിതം.
