ന്യൂയോര്ക്ക്:അമേരിക്കന് ബഹിരാകാശ ഏജന്സിയായ നാസയില് ജോലി ചെയ്യുക എന്നത് ബഹിരാകാശ പ്രേമികളുടെയും ശാസ്ത്രജ്ഞരുടെയും സ്വപ്നമാണ്. നാസയുടെ ചൊവ്വാ പര്യവേക്ഷണ ദൗത്യത്തില് സഹായിച്ച് ആദ്യ ഇന്ത്യക്കാരിയായ ഡോ അക്ഷത കൃഷ്ണമൂര്ത്തി ഇതേ സ്വപ്നം സാക്ഷാത്കരിച്ച് ഇന്ത്യക്ക് അഭിമാനമായി മാറിയിരിക്കുകയാണ്. യുഎസ് പൗരന്മാരെ മാത്രമേ നാസയില് ജീവനക്കാരായി നിയമിക്കുകയുള്ളൂ. എന്നാല് അക്ഷതക്ക് ഇന്ത്യന് പൗരത്വം മാത്രമേ ഉള്ളൂ എന്നതും ഇതില് ശ്രദ്ധേയമാണ്.
ചൊവ്വയുടെ സാമ്പിളുകള് ഭൂമിയിലേക്ക് കൊണ്ടുവരാനായി അയച്ച പെര്സെവറന്സ് എന്ന റോവര് നിയന്ത്രിക്കുന്നത് ഡോക്ടര് അക്ഷത കൃഷ്ണമൂര്ത്തിയാണ്. ഒരു കാറിന്റെ വലിപ്പം ഉള്ളതാണ് ഈ പര്യവേഷണ വാഹനം. ട്രാന്സിറ്റിംഗ് എക്സോപ്ലാനറ്റ് സര്വേ സാറ്റലൈറ്റ്, ആര്ക്സെക്കന്ഡ് സ്പേസ് ടെലിസ്കോപ്പ് എനേബിളിംഗ് റിസര്ച്ച് ഇന് ആസ്ട്രോഫിസിക്സ്, നാസ-ഐഎസ്ആര്ഒ സിന്തറ്റിക് അപ്പേര്ച്ചര് റഡാര് എന്നിവയുള്പ്പെടെ വിവിധ നാസ ദൗത്യങ്ങളിലും ഈ ശാസ്ത്രജ്ഞ നേതൃത്വ സ്ഥാനങ്ങള് വഹിച്ചിട്ടുണ്ട്. നാസയുടെ ഗവേഷണ-വികസന ഗ്രാന്റുകള്, മിഷന് കണ്സെപ്റ്റ് പ്രൊപ്പോസലുകള്, മിഷന് ഡിസൈന് പഠനങ്ങള് എന്നിവയിലെ അന്വേഷക കൂടിയാണ് അവര്.
‘ഞാന് 13 വര്ഷങ്ങള്ക്ക് മുമ്പ് അമേരിക്കയില് വന്നതാണ്. നാസയില് ജോലി ചെയ്യാനും ഭൂമിയിലും ചൊവ്വയിലും ശാസ്ത്ര-റോബോട്ടിക് പ്രവര്ത്തനങ്ങള്ക്ക് നേതൃത്വം നല്കാനുള്ള സ്വപ്നമായാണ് ഞാന് ഇവിടെ വന്നത്. എന്നാല് യുഎസ് വിസയിലുള്ള ഒരു വിദേശ പൗരന് ഇത്തരമൊരു നേട്ടം കൈവരിക്കാന് കഴിയില്ലെന്നും എന്റെ ഫീല്ഡ് പൂര്ണ്ണമായും മാറ്റണമെന്നും എല്ലാവരും എന്നോട് പറഞ്ഞു. ഞാന് അവര് പറയുന്നത് കേള്ക്കാതിരുന്നതില് എനിക്ക് ഇപ്പോള് സന്തോഷമുണ്ട്’ അക്ഷത കൃഷ്ണമൂര്ത്തി പറഞ്ഞു.
‘ എംഐടിയില് പിഎച്ച്ഡി നേടുന്നത് മുതല് നാസയില് ജോലി കിട്ടുന്നത് വരെ ഒന്നും എളുപ്പമായിരുന്നില്ല.’ഒരു സ്വപ്നവും ഒരിക്കലും വലുതോ ഭ്രാന്തോ അല്ല’. ‘നിങ്ങളില് തന്നെ വിശ്വസിക്കുക, പ്രവര്ത്തിക്കുക, നിങ്ങള് കഠിനാധ്വാനം ചെയ്താല് നിങ്ങള് ആഗ്രഹിക്കുന്നിടത്ത് എത്തും’. ഇന്സ്റ്റാഗ്രാമില് അക്ഷത കൃഷ്ണമൂര്ത്തി കുറിച്ചു. അക്ഷതയെ പോലെയുള്ള ആളുകള് യുവജനങ്ങള്ക്ക് പ്രചോദനമാണെന്നും അര്ഹിക്കുന്ന അംഗീകാരം ലഭിക്കണമെന്നും നിരവധി പേരാണ് ഈ പോസ്റ്റിനു താഴെ അഭിപ്രായം രേഖപ്പെടുത്തുന്നത്.
Discussion about this post