ചണ്ഡീഗഡ്: പഞ്ചാബിൽ വീണ്ടും അതിർത്തി കടന്ന് പാക് ഡ്രോൺ എത്തി. ഫിറോസ്പൂർ ജില്ലയിലെ മബോക്ക് ജില്ലയിലാണ് സംഭവം. ഡ്രോൺ ബിഎസ്എഫ് വെടിവച്ച് വീഴ്ത്തി. ഇന്നലെ രാത്രി 10 മണിയോടെയായിരുന്നു സംഭവം.
സംഭവ സമയം ഗ്രാമത്തിന് സമീപത്തെ അതിർത്തിയിൽ പട്രോളിംഗ് നടത്തുകയായിരുന്നു ബിഎസ്എഫ്. ഇതിനിടെ അതിർത്തി കടന്ന് ഗ്രാമം ലക്ഷ്യമിട്ട് ഡ്രോൺ നീങ്ങുന്നത് ബിഎസ്എഫിന്റെ ശ്രദ്ധയിൽപ്പെടുകയായിരുന്നു. അതിർത്തി കടന്ന് എത്തിയതോടെ സംഘം ഡ്രോൺവെടിവച്ച് വീഴ്ത്തി.
ഗ്രാമത്തിലെ ആൾത്താമസം ഇല്ലാത്ത മേഖലയിലാണ് ഡ്രോൺ തകർന്ന് വീണത്. സംഭവത്തിന് ശേഷം നടത്തിയ പരിശോധനയിൽ ഡ്രോൺ കണ്ടെത്തുകയായിരുന്നു. ചൈനീസ് നിർമ്മിത ഡ്രോണാണ് എത്തിയത് എന്ന് പരിശോധനയിൽ വ്യക്തമായി. ഡിജെഐ മാവിക് 3 ക്ലാസിക് ഡ്രോണാണ് ഇതെന്നും ബിഎസ്എഫ് വ്യക്തമാക്കി. അതേസമയം സംഭവത്തിൽ അന്വേഷണം ആരംഭിച്ചിട്ടുണ്ട്. അതിർത്തി മേഖലകളിൽ ഉൾപ്പെടെ പരിശോധന ആരംഭിച്ചു. ഗ്രാമവാസികൾക്ക് അതീവ ജാഗ്രതാ നിർദ്ദേശവും നൽകിയിട്ടുണ്ട്.
