കോഴിക്കോട് : മുസ്ലിംലീഗിന്റെ കുളിക്കടവിൽ വന്ന് തോണ്ടി വിളിക്കുകയാണ് സിപിഎം എന്ന് മുസ്ലിംലീഗ് നേതാവ് എംകെ മുനീർ. ഇരു തോണിയിൽ കാലു വയ്ക്കുന്നവരല്ല മുസ്ലിം ലീഗ് എന്നും മുനീർ വ്യക്തമാക്കി. മുഖ്യമന്ത്രി പിണറായി വിജയനെയും എം കെ മുനീർ രൂക്ഷമായി വിമർശിച്ചു.
മുഖ്യമന്ത്രി പിണറായി വിജയന്റെ തൊലിയൊന്ന് മാന്തി നോക്കിയാൽ കാവിനിറം കാണാൻ കഴിയും എന്നാണ് മുനീർ അഭിപ്രായപ്പെട്ടത്. ആ പിണറായി വിജയന്റെ കൂടെ നിൽക്കാൻ നട്ടെല്ലിന്റെ സ്ഥാനത്ത് വാഴനാര് പോലുമില്ലാത്ത നിരവധി പേർ കൂടെ കാണും. പക്ഷേ മുസ്ലീംലീഗിനെ ആ കൂട്ടത്തിൽ കൂട്ടേണ്ടെന്നും മുനീർ വ്യക്തമാക്കി.
നട്ടെല്ലിന് നല്ല ഉറപ്പും നല്ല തലയെടുപ്പും ഉള്ള പാർട്ടിയാണ് മുസ്ലിം ലീഗ്. ആ മുസ്ലിം ലീഗിനെ നിങ്ങളുടെ ആലയിൽ കൊണ്ട് കെട്ടാൻ നിങ്ങൾ അടുപ്പത്ത് വെള്ളം വെച്ചിട്ടുണ്ടെങ്കിൽ അത് വാങ്ങി വയ്ക്കുകയാണ് നല്ലത് എന്നും എംകെ മുനീർ വ്യക്തമാക്കി.
രണ്ടു തരത്തിൽ ആളുകളെ കൊല്ലുന്നവരാണ് സിപിഎം. ഒന്നുകിൽ ഞെക്കിക്കൊല്ലും അല്ലെങ്കിൽ നക്കിക്കൊല്ലും. എന്നാൽ ഇതിന് രണ്ടിനും നിന്നു കൊടുക്കാൻ മുസ്ലിം ലീഗിന് ഇപ്പോൾ സൗകര്യം ഇല്ല എന്നും എം കെ മുനീർ വ്യക്തമാക്കി.
