ന്യൂഡൽഹി: ആർട്ടിക്കിൾ 370 റദ്ദാക്കിയ കേന്ദ്ര സർക്കാർ തീരുമാനത്തെ ശരിവച്ച സുപ്രീം കോടതി വിധിയെ പ്രശംസിച്ച് പ്രധാനമന്ത്രി നരേന്ദ്ര മോദി. ജമ്മുകശ്മീരിലെയും ലഡാക്കിലെയും സഹോദരീ സഹോദരന്മാരുടെ പ്രതീക്ഷയുടെയും പുരോഗതിയുടെയും ഐക്യത്തിന്റെയും ഉജ്ജ്വലമായ പ്രഖ്യാപനമാണിത് എന്നാണ് പ്രധാനമന്ത്രി പ്രതികരിച്ചത്.
‘ആർട്ടിക്കിൾ 370 റദ്ദാക്കിയതിനെക്കുറിച്ചുള്ള ഇന്നത്തെ സുപ്രീം കോടതി വിധി ചരിത്രപരവും ഭരണഘടനാപരമായി 2019 ഓഗസ്റ്റ് 5-ന് ഇന്ത്യൻ പാർലമെന്റ് എടുത്ത തീരുമാനത്തെ ഉയർത്തിപ്പിടിക്കുന്നതുമാണ്. ഇത് നമ്മുടെ പ്രതീക്ഷയുടെയും പുരോഗതിയുടെയും ഐക്യത്തിന്റെയും ഉജ്ജ്വലമായ പ്രഖ്യാപനമാണ്. കോടതിയുടെ അഗാധമായ അറിവുകൊണ്ട് ഇന്ത്യക്കാർ എന്ന നിലയിൽ നാം കാത്തുസൂക്ഷിക്കുന്ന ഐക്യത്തിന്റെ സത്തയെ ശക്തിപ്പെടുത്തിയിരിക്കുന്നു’- അദ്ദേഹം ട്വീറ്റ് ചെയ്തു.
ജമ്മു കശ്മീരിലെയും ലഡാക്കിലെയും ജനങ്ങളുടെ ആഗ്രഹങ്ങളെ പൂർത്തീകരിക്കാൻ ഞങ്ങൾ പ്രതിജ്ഞാബദ്ധരാണ്. ഈ സ്വപ്നങ്ങൾ പൂർത്തിയാക്കാനുള്ള ഞങ്ങളുടെ പരിശ്രമങ്ങൾ ഇനിയും തുടരും. നിങ്ങളിലേക്ക് ഈ പുരോഗതികൾ എത്തിക്കുക മാത്രമല്ല, ഇതിന്റെ നേട്ടങ്ങൾ ആർട്ടിക്കിൾ 370 മൂലം ബുദ്ധിമുട്ടനുഭവിച്ച ഏറ്റവും ദുർബലരും പാർശ്വവൽക്കരിക്കപ്പെട്ടവരുമായ വിഭാഗങ്ങളിലേക്കും ഞങ്ങൾ എത്തിക്കും’- അദ്ദേഹം കൂട്ടിച്ചേർത്തു.
Discussion about this post