റിങ്കുവിനും സൂര്യകുമാറിനും അർദ്ധ സെഞ്ച്വറി; മഴക്കളിയിൽ ഇന്ത്യക്കെതിരെ ദക്ഷിണാഫ്രിക്ക പൊരുതുന്നു

പോർട്ട് എലിസബത്ത്: ദക്ഷിണാഫ്രിക്കക്കെതിരായ ട്വന്റി 20 പരമ്പരയിലെ രണ്ടാം മത്സരത്തിൽ ഇന്ത്യക്ക് മികച്ച സ്കോർ. റിങ്കു സിംഗും ക്യാപ്ടൻ സൂര്യകുമാർ യാദവും അർദ്ധ സെഞ്ച്വറികൾ കണ്ടെത്തിയ മത്സരത്തിൽ 19.3 ഓവറിൽ ഇന്ത്യ 7 വിക്കറ്റ് നഷ്ടത്തിൽ 180 റൺസെടുത്തു. മഴ മൂലം കളി മുടങ്ങിയതിനെ തുടർന്ന് ആതിഥേയരുടെ വിജയലക്ഷ്യം 15 ഓവറിൽ 152 റൺസായി പുനർ നിർണയിക്കുകയായിരുന്നു.

റിങ്കു സിംഗ് 39 പന്തിൽ 68 റൺസുമായി പുറത്താകാതെ നിന്നപ്പോൾ, സൂര്യകുമാർ യാദവ് 36 പന്തിൽ 56 റൺസ് നേടി. ഇന്ത്യൻ ഓപ്പണർമാരായ യശസ്വി ജയ്സ്വാളും ശുഭ്മാൻ ഗില്ലും പൂജ്യത്തിന് പുറത്തായി. തിലക് വർമ 29 റൺസും രവീന്ദ്ര ജഡേജ 19 റൺസും നേടി. ദക്ഷിണാഫ്രിക്കക്ക് വേണ്ടി ജെറാൾഡ് കോട്സീ 3 വിക്കറ്റ് വീഴ്ത്തി.

മറുപടി ബാറ്റിംഗിൽ ദക്ഷിണാഫ്രിക്ക പവർ പ്ലേ പിന്നിടുമ്പോൾ 1 വിക്കറ്റ് നഷ്ടത്തിൽ 83 റൺസ് നേടിയിട്ടുണ്ട്. 40 റൺസുമായി റീസ ഹെൻഡ്രിക്സും 22 റൺസുമായി ക്യാപ്ടൻ ഏയ്ദൻ മാർക്രമുമാണ് ക്രീസിൽ. 16 റൺസെടുത്ത മാത്യു ബ്രീറ്റ്സ്കെ റൺ ഔട്ടായി.

നേരത്തേ ടോസ് നേടിയ ദക്ഷിണാഫ്രിക്ക ഇന്ത്യയെ ബാറ്റിംഗിന് അയക്കുകയായിരുന്നു. പരമ്പരയിലെ ആദ്യ മത്സരം മഴ മൂലം ഉപേക്ഷിച്ചിരുന്നു.